റിയാദ്: ലോക ഫുട്ബോളിലെ ഏറ്റവും മികച്ച താരത്തിന് ലഭിക്കുന്ന ബാലൺ ഡി ഓർ അവാർഡ് നേടാൻ സാധിക്കാതെ പോയതിനെക്കുറിച്ച് സംസാരിക്കുകയാണ് ബ്രസീലിയൻ സൂപ്പർതാരം നെയ്മർ. പരുക്കുകൾ വില്ലനായി എത്തിയതാണ് ബാലൺ ഡി ഓർ നഷ്ടമാവാൻ കാരണമെന്നാണ് നെയ്മർ പറഞ്ഞത്. മുൻ ബ്രസീലിയൻ താരം റൊമാരിയോയുമായുള്ള അഭിമുഖത്തിലാണ് നെയ്മർ ഇക്കാര്യം പറഞ്ഞത്. 

'ഇന്ന് ഞാൻ കരുതുന്നു ഞാൻ വളരെ നിർഭാഗ്യവാനാണ്. പരുക്കുകൾ മൂലം ഞാൻ നിർഭാഗ്യവാനായിരുന്നു. ഏഴ് വർഷം തുടർച്ചയായി എനിക്ക് പരുക്ക് പറ്റികൊണ്ടിരുന്നു. മൂന്ന് മാസവും ആറ് മാസവും ഞാൻ പരുക്കുകൾ പറ്റി പുറത്തായികൊണ്ടിരുന്നു. അതാണ് ബാലൺ ഡി ഓർ നേടാൻ എന്നെ തടസ്സപ്പെടുത്തിയത്,' നെയ്മർ പറഞ്ഞു.

നിലവിൽ സഊദി ക്ലബായ അൽ ഹിലാലിന്റെ താരമാണ് നെയ്മർ. അൽ ഹിലാലിലും പരുക്ക് വില്ലനായി നെയ്മറെ തേടിയെത്തി. 2023ൽ നടന്ന ലോകകപ്പ് യോഗ്യത മത്സരത്തിൽ ഉറുഗായ്ക്കെതിരെയുള്ള മത്സരത്തിലായിരുന്നു നെയ്മറിന് പരുക്ക് പറ്റിയിരുന്നത്.

ഇതിനു പിന്നാലെ നെയ്മർ ശസ്ത്രക്രിയക്ക് വിധേയനാവുകയും ഫുട്ബാളിൽ നിന്നും നീണ്ട കാലത്തേക്ക് പുറത്താവുകയും ആയിരുന്നു. ഇതോടെ അൽ ഹിലാലിനൊപ്പമുള്ള ധാരാളം മത്സരങ്ങൾ നെയ്മറിന് നഷ്ടമായിരുന്നു.