സാൻ്റിയാഗോ ബെർണബ്യൂ: യുവേഫ ചാമ്പ്യൻസ് ലീഗിൽ റയൽ മാഡ്രിഡിന് തകർപ്പൻ വിജയം. ആർബി സാൽസ്ബർഗിനെ ഒന്നിനെതിരെ അഞ്ചു ഗോളുകൾക്കാണ് റയൽ പരാജയപ്പെടുത്തിയത്. റയലിനായി ബ്രസീലിയൻ താരങ്ങളായ വിനീഷ്യസ് ജൂനിയർ, റോഡ്രിഗോ എന്നിവർ ഇരട്ടഗോളുകളും കിലിയൻ എംബാപ്പെ ഒരു ഗോളും നേടി. 

മത്സരത്തിൽ രണ്ട് ഗോൾ നേടിയതിന് പിന്നാലെ റയലിനൊപ്പമുള്ള തന്റെ ഫുട്ബോൾ യാത്രയിലെ ഒരു അവിസ്മരണീയമായ നേട്ടമാണ് വിനീഷ്യസ് ജൂനിയർ സ്വന്തമാക്കിയത്. റയലിനൊപ്പം 100 ഗോളുകൾ പൂർത്തിയാക്കാനാണ് ബ്രസീലിയൻ താരത്തിന് സാധിച്ചത്. റയൽ മാഡ്രിഡിനായി 100 ഗോളുകൾ നേടുന്ന 23-ാമത്തെ താരമാണ് വിനീഷ്യസ്. ഇതിനോടകം തന്നെ 101 തവണയാണ് വിനീഷ്യസ് എതിരാളികളുടെ വലയിൽ പന്തെത്തിച്ചത്. 

സാൽസ്ബർഗിന് വേണ്ടി മാഡ്‌സ്‌ മിഡ്സ്ട്രപ്പ് ആണ് ഗോൾ നേടിയത്. മത്സരത്തിൽ ബോൾ കൈവശം വെക്കുന്നതിലും ഷോട്ടുകളുടെ കാര്യത്തിലും റയൽ ആയിരുന്നു മുന്നിട്ടുനിന്നിരുന്നത്. 71 ശതമാനം ബോൾ പൊസഷനും റയലായിരുന്നു സ്വന്തമാക്കിയിരുന്നത്. 14 ഷോട്ടുകളാണ് റയൽ എതിരാളികളുടെ പോസ്റ്റിലേക്ക് ഉതിർത്തത്. ഇതിൽ ആറെണ്ണവും ഓൺ ടാർഗെറ്റിലേക്ക് ആയിരുന്നു. 

നിലവിൽ ചാമ്പ്യൻസ് ലീഗ് പോയിന്റ് പട്ടികയിൽ 16 സ്ഥാനത്താണ് റയൽ മാഡ്രിഡ്. ഏഴ് മത്സരങ്ങളിൽ നിന്നും നാല് വിജയവും മൂന്ന്‌ തോൽവിയും അടക്കം 12 പോയിന്റാണ് റയലിന്റെ കൈവശമുള്ളത്. ലാ ലീഗയിൽ ജനുവരി 26ന് റിയൽ വല്ലാഡോലിഡിനെതിരെയാണ് റയലിന്റെ അടുത്ത മത്സരം.