പെര്‍ളടുക്ക: കൊളത്തൂര്‍ മടന്തക്കോട് മാളത്തില്‍ ഇന്നലെ രാത്രി കുടുങ്ങിയ പുലി ചാടിപ്പോയി.  ഇന്നലെ വൈകിട്ട് ഏഴോടെയാണ് നാട്ടുകാര്‍ പുലിയെ പാറമടയിലെ മാളത്തില്‍ കുടുങ്ങിയ നിലയില്‍ കണ്ടെത്തിയത്. തുടര്‍ന്ന് വനം വകുപ്പിനെ വിവരം അറിയിക്കുകയായിരുന്നു. 

പിന്നാലെ സ്ഥലത്തെത്തിയ വനം വകുപ്പിന്റെ വെറ്ററിനറി ഡോക്ടര്‍മാര്‍ അടക്കമുള്ളവര്‍ മയക്കു വെടി വെച്ചപ്പോള്‍ ആണ് പുലി രക്ഷപ്പെട്ടത്. പുലിക്ക് വെടി കൊണ്ടതായി വനംവകുപ്പ് പറയുന്നു. 

കഴിഞ്ഞ ഏതാനും ദിവസങ്ങളായി പെര്‍ളടക്കം കൊളത്തൂര്‍ കുണ്ടംകുഴി തോണിക്കടവ്, മരുതടുക്കം ശങ്കരംകാട്, ദര്‍ബോണി, ബത്തകുമ്പിരി, കല്ലളി കോളോട്ട് എന്നിവിടങ്ങളില്‍ പുലി ഭീഷണി നിലനില്‍ക്കുന്നുണ്ട്. ഈ പ്രദേശങ്ങളില്‍ നിന്നും പത്തോളം നായകളെ കാണാതായതായും നാട്ടുകാര്‍ പറയുന്നു.