കുവൈത്ത് സിറ്റി: വാട്ടര്‍ ഗണ്ണുകളുടെയും വാട്ടര്‍ ബലൂണിന്റെയും വില്‍പ്പനക്ക് നിരോധനമേര്‍പ്പെടുത്തി കുവൈത്ത്. കുവൈത്ത് വാണിജ്യ, വ്യവസായ മന്ത്രാലയമാണ് ഇത്തരമൊരു നടപടിയെടുത്തിരിക്കുന്നത്. ഡിസംബര്‍ ഒന്നു മുതല്‍ മാര്‍ച്ച് 31 വരെയുള്ള കാലയളവിലാണ് നിരോധനം ഏര്‍പ്പെടുത്തിയിരിക്കുന്നത്. ഫെബ്രുവരി 25, 26 തീയതികളില്‍ കുവൈത്തില്‍ നടക്കുന്ന ദേശീയ ദിനാഘോഷങ്ങളുടെ ഭാഗമായാണ് വ്യവസായ മന്ത്രാലയത്തിന്റെ നടപടി. 

ആഘോഷത്തിന്റെ ഭാഗമായി വാട്ടര്‍ ഗണ്ണുകളും വാട്ടര്‍ ബലൂണും ഉപയോഗിച്ച് കുട്ടികളും മുതിര്‍ന്ന ആളുകളും പൊതുജനങ്ങള്‍ക്ക് നേരെ വെള്ളം ചീറ്റുകയും ജലം പാഴാക്കുകയും ചെയ്യാനിടയുണ്ട്. ഇത്തരം പ്രവണതകള്‍ ഒഴിവാക്കാനും പൊതുക്രമ സമാധാനം നിലനിര്‍ത്താനും ലക്ഷ്യമിട്ടാണ് മന്ത്രാലയം വാട്ടര്‍ ഗണ്ണിനും വാട്ടര്‍ബലൂണിനും നിരോധനം ഏര്‍പ്പെടുത്തിയിരിക്കുന്നത്.