കൊച്ചി : കേന്ദ്ര സര്‍ക്കാര്‍ സ്ഥാപനമായ കയര്‍ ബോര്‍ഡിന്റെ കൊച്ചി ആസ്ഥാനത്ത് തൊഴില്‍ പീഡനമെന്ന് പരാതി നല്‍കിയ ഉദ്യോഗസ്ഥ മരിച്ചു. സെറിബ്രല്‍ ഹെമിറേജ് ബാധിതയായിലായിരുന്ന ഗുരുതരാവസ്ഥയില്‍ ചികിത്സയിലായിരുന്ന സെക്ഷന്‍ ഓഫീസര്‍ ജോളി മധു (56) ആണ് മരിച്ചത്. ഇന്ന് കൊച്ചിയിലെ സ്വകാര്യ ആശുപത്രിയിലാണ് അന്ത്യം. 

കയര്‍ബോര്‍ഡ് ചെയര്‍മാന്‍ ഉള്‍പ്പെടെയുള്ളവരുടെ തൊഴില്‍ പീഡനത്തെയും മാനസിക സമ്മര്‍ദ്ദത്തെയും തുടര്‍ന്നാണ് ജോളി സെറിബ്രല്‍ ഹെമിറേജ് ബാധിതയായതെന്ന് കുടുംബം ആരോപിച്ചിരുന്നു.

ബോര്‍ഡില്‍ നടന്ന അഴിമതിയെ കുറിച്ച് റിപ്പോര്‍ട്ട് ചെയ്ത ജോളിയോട് മേലുദ്യോഗസ്ഥര്‍ പ്രതികാരബുദ്ധിയോടെ പെരുമാറിയെന്നും കാന്‍സര്‍ രോഗിയെന്ന പരിഗണന പോലും നല്‍കാതെ ആറുമാസം മുന്‍പ് ആന്ധ്രാപ്രദേശിലേക്ക് സ്ഥലംമാറ്റുകയായിരുന്നുവെന്ന് കുടുംബം ആരോപിച്ചിരുന്നു. ശമ്പളം പോലും തടഞ്ഞുവച്ചു.

കയര്‍ബോര്‍ഡ് സെക്രട്ടറിയ്ക്കും എം.എസ്.എം.ഇ മന്ത്രാലയത്തിനുമായിരുന്നു കുടുംബം പരാതി നല്‍കിയത്. ഓഫിസിലെ തൊഴില്‍ പീഡനത്തെ പറ്റി പ്രധാനമന്ത്രിയുടെ ഓഫീസിനും രാഷ്ട്രപതിക്കും ജോളി കത്തയച്ചിരുന്നു.

കേന്ദ്ര സഹമന്ത്രി ശോഭ കരന്തലജയെ നേരില്‍ കണ്ട് പരാതി നല്‍കിയിരുന്നുവെന്നും ദേശീയ മനുഷ്യാവകാശ കമ്മീഷന്‍ നടപടിയെടുത്തില്ലെന്നും കുടുംബം ആരോപിച്ചിരുന്നു.

കയര്‍ ബോര്‍ഡില്‍ 30 വര്‍ഷത്തെ സേവനമുള്ള ജോളിക്ക് വിരമിക്കാന്‍ മൂന്ന് വര്‍ഷം മാത്രമാണു ബാക്കിയുണ്ടായിരുന്നത്.