ജിദ്ദ: പുകയില ഉൽപന്നങ്ങളുടെ വിൽപനയ്ക്ക് നിയന്ത്രണമേർപ്പെടുത്താനൊരുങ്ങി സഊദി അറേബ്യ. പലചരക്ക് കടകൾ (ബഖാല), സെൻട്രൽ മാർക്കറ്റുകൾ എന്നിവിടങ്ങളിൽ പുകയില ഉൽപന്നങ്ങൾ വിൽക്കുന്നത് നിരോധിക്കാനാണ് സഊദി മുനിസിപ്പാലിറ്റി ആൻഡ് ഹൗസിങ് മന്ത്രാലയത്തിന്റെ നിർദേശം. കരട് അന്തിമ രൂപത്തിലാക്കുന്നതിന് മുമ്പ് പൊതുജനങ്ങളുടെ അഭിപ്രായങ്ങളും കാഴ്ചപ്പാടുകളും അറിയാനായി മന്ത്രാലയം പബ്ലിക് സർവേ പ്ലാറ്റ്‌ഫോമായ ഇസ്തിത്‌ലയിൽ പ്രസിദ്ധീകരിച്ചിട്ടുണ്ട്.

പുകയില ഉൽപന്നങ്ങളുടെ വിൽപ്പനയുമായി ബന്ധപ്പെട്ട നിരവധി നിയന്ത്രണങ്ങൾ കരട് നിയമങ്ങളിൽ ഉൾപ്പെടുന്നു. ഇതനുസരിച്ച്, പുകയില ഉൽപന്നങ്ങളുടെ വിൽപ്പന സഊദി ഫുഡ് ആൻഡ് ഡ്രഗ് അതോറിറ്റി (SFDA) പുറപ്പെടുവിച്ച സ്റ്റാൻഡേർഡ് സ്പെസിഫിക്കേഷനുകൾ പാലിക്കണം. പുകയില ഉൽപന്നങ്ങൾ ഉപഭോക്താക്കൾക്ക് കാണാൻ കഴിയാത്ത രീതിയിൽ അടച്ച അറകളിൽ സൂക്ഷിക്കണം. 18 വയസ്സിൽ താഴെയുള്ളവർക്ക് പുകയില ഉൽപന്നങ്ങൾ വിൽക്കുന്നതിനും വിലക്കേർപ്പെടുത്തിയിട്ടുണ്ട്. വിൽപനക്കാർ ഉപഭോക്താക്കളുടെ പ്രായം ഉറപ്പുവരുത്തണം. കൂടാതെ, പുകയില ഉൽപന്നങ്ങളുടെ പരസ്യം ചെയ്യാനോ പ്രചരിപ്പിക്കാനോ പാടില്ല, സ്‌ഥാപനങ്ങളിലെ ജീവനക്കാരും ഉപഭോക്‌താക്കളും പുകവലിക്കരുത്. പുകവലിയുടെ ദോഷങ്ങളെക്കുറിച്ച് മുന്നറിയിപ്പ് നൽകുന്ന ബോർഡ് സ്ഥാപിക്കണം ഇതിൽ "പുകവലി, പുകയില ഉൽപ്പന്നങ്ങൾ വായ, ശ്വാസകോശം, ഹൃദയം, ധമനികളിലെ രോഗങ്ങൾക്കും, കാൻസറിനും പ്രധാന കാരണമാണ്" എന്ന മുന്നറിയിപ്പ് വാക്യവും പുകവലി വിരുദ്ധ നിയമത്തിൽ വ്യക്തമാക്കിയിരിക്കുന്ന പ്രായത്തിന് താഴെയുള്ള ആർക്കും പുകയില ഉൽപ്പന്നങ്ങൾ വിൽക്കുന്നത് നിരോധിക്കുന്നു ഒരു വാക്യവും ഉണ്ടായിരിക്കണം.

കടകളിൽ എനർജി ഡ്രിങ്കുകൾ മറ്റു പാനീയങ്ങളിൽ നിന്ന് മാറ്റി പ്രദർശിപ്പിക്കണം. കൂടാതെ, 16 വയസ്സിൽ താഴെയുള്ളവർക്ക് എനർജി ഡിങ്കുകൾ വിൽക്കാൻ പാടില്ല. ഹോം ഡെലിവറി നടത്തുന്നവർക്ക് ഇതിനായി അനുമതി പ്രത്യേക ഉണ്ടായിരിക്കണമെന്നും കരട് നിയമത്തിൽ പറയുന്നു. 

കൂടാതെ, ജീവനക്കാർക്ക് പകർച്ചവ്യാധികൾ ഉണ്ടാകാൻ പാടില്ല അധവാ രോഗലക്ഷണങ്ങൾ കണ്ടാൽ ജീവനക്കാരെ ജോലിയിൽ നിന്ന് മാറ്റണം എന്നിങ്ങനെ നിർദേശങ്ങൾ നീളുന്നു.വയറിളക്കം, പനി, ഛർദ്ദി തുടങ്ങിയ പകർച്ചവ്യാധികളുമായി ബന്ധപ്പെട്ട ഏതെങ്കിലും രോഗലക്ഷണങ്ങൾ കാണിക്കുകയോ കോളറ, ഹെപ്പറ്റൈറ്റിസ്, ടൈഫോയിഡ് തുടങ്ങിയ രോഗങ്ങളിൽ ഒന്ന് ബാധിച്ചതായി കണ്ടെത്തുകയോ ചെയ്താൽ തൊഴിലാളിയെ ജോലിയിൽ നിന്ന് തടയാൻ ഭക്ഷ്യ സ്ഥാപനം ബാധ്യസ്ഥനാണെന്നും കരട് നിയമങ്ങൾ ചൂണ്ടിക്കാട്ടി.

Saudi Arabia has introduced a new law prohibiting the sale of tobacco products in grocery stores and central markets aiming to reduce smoking rates and promote public health