ശക്തമായ ഹൃദയമാണ് നല്ല ആരോഗ്യത്തിന്റെ അടിത്തറ. മാത്രമല്ല, ഇതിനായി നിങ്ങളുടെ ഹൃദയത്തെ മികച്ച നിലയില്‍ നിലനിര്‍ത്താന്‍ പതിവായി ചില വ്യായാമങ്ങളും ചെയ്യുക. ഇതിനുവേണ്ടി ജിമ്മിലൊന്നും പോകേണ്ടതുമില്ല. നമുക്കിത് വീട്ടില്‍ തന്നെ ചെയ്യാവുന്നതാണ്. രക്തചംക്രമണം മെച്ചപ്പെടുത്തുകയും ഹൃദ്രോഗ സാധ്യത കുറയ്ക്കുകയും ചെയ്യുന്നതാണ് ഈ വ്യായാമങ്ങള്‍. 

എങ്ങനെ ശക്തിപ്പെടുത്താം ഹൃദയത്തെ

ജമ്പ് റോപ്പ്

ഇതിനായി കാര്‍ഡിയോ വാസ്‌കുലാര്‍ വ്യായാമമാണ് ചെയ്യേണ്ടത്. ഇത് നിങ്ങളുടെ ഹൃദയമിടിപ്പ് വേഗത്തില്‍ വര്‍ധിപ്പിക്കുന്നു. ഹാന്‍ഡിലുള്ള ഒരു കയറിന്റെ രണ്ടുവശവും പിടിച്ച് തലയ്ക്കു മുകളിലൂടെ ആട്ടുക (വള്ളിച്ചാട്ടം). രണ്ടുകാലുകള്‍ ഒരുമിച്ചു വച്ചോ മാറിമാറി വച്ചോ ചാടാവുന്നതാണ്. രണ്ട് മിനിറ്റ് ചെയ്യാം. ക്രമേണ ദൈര്‍ഘ്യം കൂട്ടിക്കൊടുക്കാം. ഇത് കലോറി കത്തിക്കാന്‍ സഹായിക്കുകയും കാര്‍ഡിയോവാസ്‌കുലാര്‍ സഹിഷ്ണുത മെച്ചപ്പെടുത്തുകയും ചെയ്യുന്നു. 

കാല്‍മുട്ട്

നേരെ നില്‍ക്കുക. ശേഷം നിങ്ങളുടെ കാല്‍മുട്ടുകള്‍ കഴിയുന്നത്ര ഉയരത്തില്‍ ഉയര്‍ത്തിക്കൊണ്ട് ജോഗിങ് ചെയ്യുക. 30 മുതല്‍ 40 സെക്കന്റ് വരെ ചെയ്യുക. ഇങ്ങനെ ചെയ്യുമ്പോള്‍ ഹൃദയമിടിപ്പ് വേഗത്തില്‍ ഉയരുകയും രക്തചംക്രമണ മെച്ചപ്പെടുത്തുകയും ചെയ്യുന്നു. ക്രമേണ വ്യായാമ ദൈര്‍ഘ്യം കൂട്ടിക്കൊണ്ടു വരുക. കാലിലെ പേശികളെ ശക്തിപ്പെടുത്തുകയും സ്റ്റാമിന വര്‍ധിപ്പിക്കുകയും ചെയ്യുന്നു. 

പടികള്‍ കയറുക

വീട്ടില്‍ കോണിപ്പടികളുണ്ടെങ്കില്‍ അവ ദിവസവും കയറുക. ഇവ ഹൃദയത്തെ ശക്തിപ്പെടുത്തുന്ന വ്യായാമമായി ചെയ്യാവുന്നതാണ്. പടികള്‍ കയറുമ്പോള്‍ ഹൃദയമിടിപ്പ് വര്‍ധിക്കുന്നതാണ്. ഇത് ഹൃദയത്തിന്റെ മാത്രമല്ല ശ്വാസകോശത്തിന്റയും ശേഷി വര്‍ധിപ്പിക്കും. കാലുകളുടെ പേശികളെ ശക്തിപ്പെടുത്തുകയും ചെയ്യും. 

നൃത്തം ചെയ്യുക

അരമണിക്കൂര്‍ നല്ല പാട്ടൊക്കെ വച്ച് നൃത്തം ചെയ്യുന്നതും വളരെ ഗുണം ചെയ്യുന്നതാണ്. ഇത് ഹൃദയമിടിപ്പ് വര്‍ധിപ്പിക്കാനും സ്റ്റാമിന വര്‍ധിപ്പിക്കാനും മാനസികാവസ്ഥ നന്നായിരിക്കാനും സമ്മര്‍ദ്ദം കുറയ്ക്കാനും സഹായിക്കുന്നു.

വ്യത്യസ്ത വ്യായാമങ്ങള്‍ ചെയ്യുന്നതും നിങ്ങളുടെ ഹൃദയത്തിനു നല്ലതാണ്. ജമ്പിങ് ജാക്കുകള്‍, സ്‌ക്വാറ്റുകള്‍, പുഷ് അപ്പുകള്‍, പ്ലാങ്ക് ഹോള്‍ഡ് തുടങ്ങിയ വ്യായാമങ്ങള്‍ ഹൃദയമിടിപ്പ് വര്‍ധിപ്പിക്കുകയും പേശികളുടെ ഫിറ്റ്‌നസ് വര്‍ധിപ്പിക്കുകയും ചെയ്യുന്നു.