ലണ്ടൻ: ഇംഗ്ലീഷ് പ്രീമിയർ ലീഗിൽ വീണ്ടും ഗോളടിയിൽ റെക്കോർഡിട്ട് ഈജിപ്ഷ്യൻ സൂപ്പർതാരം മുഹമ്മദ്‌ സലാഹ്. എവർട്ടണിനെതിരെയുള്ള മത്സരത്തിലാണ് സലാഹ് വീണ്ടും ഗോളടിയിൽ നേട്ടം കൈവരിച്ചത്. മത്സരത്തിൽ ഒരു ഗോളാണ് താരം നേടിയത്. ഈ സീസണിൽ സലാഹ് ലിവർപൂളിനായി എവേ മത്സരങ്ങളിൽ സ്വന്തമാക്കുന്ന 22ാം ഗോൾ കോൺട്രിബ്യുഷൻ ആയിരുന്നു ഇത്. 

ഈ സീസണിൽ എതിരാളികളുടെ തട്ടകത്തിൽ 13 ഗോളുകളും ഒമ്പത് അസിസ്റ്റുകളുമാണ്‌ സലാഹ് നേടിയത്. ഇംഗ്ലീഷ് പ്രീമിയർ ലീഗിന്റെ ചരിത്രത്തിൽ ഒരു സീസണിൽ എവേ മത്സരങ്ങളിൽ ഒരു താരം സ്വന്തമാക്കുന്ന ഏറ്റവും ഉയർന്ന ഗോൾ കോൺട്രിബ്യുഷൻ കണക്കുകൾ ആണിത്.  ആൻഡി കോളിന്റെ റെക്കോർഡാണ് സലാഹ് തകർത്തത്. 1993-94 സീസണിൽ 21 ഗോൾ കോൺട്രിബ്യുഷൻസായിരുന്നു കോൾ നടത്തിയിരുന്നത്. 

മത്സരത്തിൽ ഇരു ടീമുകളും രണ്ട് ഗോൾ വീതം നേടി സമനിലയിൽ പിരിയുകയായിരുന്നു. മത്സരത്തിൽ 11ാം മിനിറ്റിൽ ബീറ്റോയിലൂടെ എവർട്ടൺ ആണ് ആദ്യം ലീഡ് നേടിയത്. എന്നാൽ 16ാം മിനിറ്റിൽ അലക്സിസ് മാക് അലിസ്റ്ററിലൂടെ ലിവർപൂൾ ഗോൾ തിരിച്ചടിക്കുകയായിരുന്നു. ഒടുവിൽ ആദ്യ പകുതിയിൽ ഇരു ടീമുകളും ഓരോ ഗോൾ വീതം നേടി തുല്യത പാലിക്കുകയായിരുന്നു. 

രണ്ടാം പകുതിയിൽ 73ാം മിനിറ്റിൽ സലാഹ് ലിവർപൂളിനെ മുന്നിലെത്തിച്ചു. ലിവർപൂൾ വിജയം ഉറപ്പാക്കിയ നിമിഷത്തിൽ ആയിരുന്നു ഇഞ്ചുറി ടൈമിൽ ജെയിംസ് തർക്കോവ്സ്കിയുടെ ഗോളിലൂടെ എവർട്ടൺ സമനില പിടിച്ചത്. മത്സരത്തിൽ രണ്ട് ടീമിലെയും താരങ്ങൾ ചുവപ്പ് കാർഡ് കണ്ട് പുറത്തായിരുന്നു. എവർട്ടൺ താരം  അബ്ദുളയെ ഡൗക്കോറെ ലിവർപൂൾ താരം കർട്ടിസ് ജോൺസ് എന്നിവരാണ് റെഡ് കാർഡ് കണ്ട് പുറത്തായത്. ഇഞ്ചുറി ടൈമിൽ ആയിരുന്നു ഇരുവരും പുറത്തായത്. 

നിലവിൽ ഇംഗ്ലീഷ് പ്രീമിയർ ലീഗ് പോയിന്റ് പട്ടികയിൽ ഒന്നാം സ്ഥാനത്താണ് ലിവർപൂൾ. 24 മത്സരങ്ങളിൽ നിന്നും 17 വിജയവും 6 സമനിലയും ഒരു തോൽവിയും അടക്കം 57 പോയിന്റാണ് ലിവർപൂളിന്റെ കൈവശമുള്ളത്. 50 പോയിന്റോടെ ആഴ്‌സണൽ ആണ് രണ്ടാം സ്ഥാനത്തുള്ളത്. ഫെബ്രുവരി 16ന് വോൾവസിനെതിരെയാണ് ലിവർപൂളിന്റെ അടുത്ത മത്സരം. ലിവർപൂളിന്റെ തട്ടകമായ ആൻഫീൽഡിലാണ് മത്സരം നടക്കുക.