മനാമ: അറാദിൽ റസ്റ്റോറൻ്റിലെ ഗ്യാസ് സിലിണ്ടർ പൊട്ടിത്തെറിച്ച് രണ്ടുനില കെട്ടിടം തകർന്നു വീണുണ്ടായ അപകടത്തിൽ മരണം രണ്ടായി. ബഹ്റൈനി പൗരനായ അലി അബ്ദുല്ല അലി അൽ ഹമീദ് (66), ബംഗ്ലാദേശ് പൗരനായ ഷൈമോൾ ചന്ദ്ര ഷിൽ മൊനിന്ദ്ര (42) എന്നിവരാണ് മരിച്ചത്. അബ്ദുല്ല അലി അൽ ഹമീദിൻ്റെ മൃതദേഹം  കെട്ടിടാവശിഷ്ടങ്ങൾക്കിടയിലെ തിരച്ചിലിനിടയിലാണ് കണ്ടെടുത്തത്. അപകടത്തിൽ നിരവധി പേർക്ക് പരുക്കേറ്റിട്ടുണ്ട്. ഇവരെ കിങ് ഹമദ് ആശുപത്രിയിലേക്ക് മാറ്റി.

സംഭവസ്ഥലത്ത് പൊലിസും ബഹ്റൈൻ സിവിൽ ഡിഫൻസും രക്ഷാപ്രവർത്തനം തുടരുകയാണ്. അറാദിലെ സീഫ് മാളിന് സമീപത്തെ ബഹ്റൈനി റസ്റ്റോറൻ്റിലായിരുന്നു അപകടം. കെട്ടിടത്തിൻ്റെ ഒരു ഭാഗത്ത് പ്രവർത്തിച്ചിരുന്ന സലൂണും  തകർന്ന നിലയിലാണ്.

കെട്ടിടത്തിന്റെ മുകൾ നിലയിൽ താമസക്കാരുണ്ടായിരുന്നതായും എന്നാൽ, മലയാളികൾ ആരും കെട്ടിടത്തിൽ താമസിച്ചിരുന്നായി ഓർക്കുന്നില്ലെന്നും സമീപവാസികൾ പറഞ്ഞു. ബിൽഡിങ് പൂർണമായും തകർന്ന നിലയിലാണ്. അതേസമയം, പ്രദേശത്തെ ചില കടകളുടെ ഗ്ലാസുകളും പൊട്ടിത്തെറിയുടെ ആഘാതത്തിൽ തകർന്നിട്ടുണ്ട്.

A tragic incident occurred in Aradi when a building collapsed, resulting in the loss of two lives and injuring several others.