ബെംഗളൂരു:ബെംഗളൂരുവിലെ നമ്മ മെട്രോയുടെ കുത്തനെയുള്ള നിരക്ക് വർദ്ധനവ്  പിൻവലിക്കാൻ ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് ( ബിഎംആർസിഎൽ ) മാനേജിംഗ് ഡയറക്ടർ മഹേശ്വര റാവുവിന് നിർദേശം നൽകി കർണ്ണാടക മുഖ്യമന്ത്രി സിദ്ധരാമയ്യ. ഫെബ്രുവരി 9 ന് പ്രാബല്യത്തിൽ വന്ന വർദ്ധിച്ച മെട്രോ നിരക്ക് യാത്രക്കാർക്കിടയിൽ വലിയ എതിർപ്പുകൾക്കും വിമർശനങ്ങൾക്കും ഇടയാക്കിയിരുന്നു. 

നിരക്ക് സാധാരണക്കാരായ യാത്രക്കാർക്ക് താങ്ങാവുന്നതായിരുന്നില്ല. പിന്നാലെ പൊതു ജനരോഷം ശക്തമായതിനെ തുടർന്ന് നിരക്ക് കുറയ്ക്കാൻ മുഖ്യമന്ത്രി ആവശ്യപ്പെടുകയായിരുന്നു. പ്രശ്‌നങ്ങൾ അടിയന്തരമായി പരിഹരിക്കാനും വർദ്ധന നിരക്ക് കുറയ്ക്കുവാനും ഞാൻ ബിഎംആർസിഎൽ എംഡിയോട് പറഞ്ഞിട്ടുണ്ട് മുഖ്യമന്ത്രി വ്യക്തമാക്കി. മെട്രോ സ്‌റ്റേഷനുകളിൽ ബി.ജെ.പിയുടെയും യാത്രക്കാരുടെയും കനത്ത പ്രധിഷേധങ്ങൾ കഴിഞ്ഞ ദിവസങ്ങളിൽ നടന്നിരുന്നു.

പുതുക്കിയ നിരക്കിന് ശേഷം കുറഞ്ഞ ടിക്കറ്റ് നിരക്ക് 10 രൂപയായി, പരമാവധി ടിക്ക്റ്റ് നിരക്ക് 50ശതമാനം വർദ്ധിപ്പിച്ച് 60 രൂപയിൽ നിന്ന് 90 രൂപയായി. മെട്രോയുടെ നിരക്ക് വർദ്ധിപ്പിച്ചതിന്റെ പിറ്റേന്ന് ഫെബ്രുവരി 10 തിങ്കളാഴ്ച്ച ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് യാത്രക്കാരുടെ എണ്ണത്തിൽ 4 ശതമാനം കുറവ് രേഖപ്പെടുത്തി. പരമാവധി ടിക്കറ്റ് നിരക്ക് 90 രൂപയായിരുന്നു. ബിഎംആർസിഎല്ലിന്റെ മുൻകാല കണക്കുകൾ പ്രകാരം തിങ്കളാഴ്ച്ചയിൽ യാത്രക്കാരുടെ എണ്ണം 8.6 ലക്ഷത്തിലധികമായി കുറഞ്ഞു.നിലവിൽ 8.29 ലക്ഷമാണ് കണക്ക്.

അതേ സമയം 'എയ്‌റോ ഇന്ത്യ 2025 ' എന്ന മെഗാ എയ്‌റോ ഷോയുടെ ഉദ്ഘാടനമാണ് യാത്രക്കാരുടെ എണ്ണം കുറയാൻ  കാരണമെന്ന് ബിഎംആർസിഎൽ ഉദ്യോഗസ്ഥർ പറഞ്ഞു.