വാഷിങ്ടണ്‍: യുഎസിന് ഇറക്കുമതി തീരുവ ചുമത്തുന്ന രാജ്യങ്ങള്‍ക്ക് ട്രംപ് ഭരണകൂടം തിരിച്ചടി നികുതി (റസിപ്രോക്കല്‍ താരിഫ്) ചുമത്തുമെന്ന് വൈറ്റ്ഹൗസ്. ഇതു സംബന്ധിച്ച ഉത്തരവില്‍ ഇന്നു പുലര്‍ച്ചെ ഒപ്പുവച്ചേക്കുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ് ഓവല്‍ ഓഫിസില്‍ മാധ്യമപ്രവര്‍ത്തകരോട് വ്യക്തമാക്കി.
പ്രധാനമന്ത്രി നരേന്ദ്ര മോദിയുടെ യു.എസ് സന്ദര്‍ശനത്തിനു തൊട്ടുമുമ്പാണ് ഇന്ത്യയെ ഉള്‍പ്പെടെ ബാധിക്കുന്ന നിര്‍ണായക നീക്കം. ചില യു.എസ് ഉല്‍പന്നങ്ങള്‍ക്ക് ഇന്ത്യ കനത്ത തീരുവയാണു ചുമത്തുന്നതെന്നും അതേപോലെ തീരുവ ചുമത്തി തിരിച്ചടിക്കാനറിയാമെന്നും ട്രംപ് ഡിസംബറില്‍ ഇന്ത്യക്ക് മുന്നറിയിപ്പു നല്‍കിയിരുന്നു.

'ഇന്ത്യയും ബ്രസീലുമാണ് യു.എസ് ഉല്‍പന്നങ്ങള്‍ക്ക് ഏറ്റവുമധികം തീരുവ ചുമത്തുന്നത്. തീരുവ ചുമത്താന്‍ അവര്‍ ആഗ്രഹിക്കുന്നുവെങ്കില്‍ കുഴപ്പമില്ല, പക്ഷേ തിരിച്ച് ഞങ്ങളും അതുതന്നെയാണു ചെയ്യാന്‍ പോകുന്നത്' ട്രംപ് പറഞ്ഞു.
യു.എസിന്റെ കടുത്ത സമ്മര്‍ദത്തെ തുടര്‍ന്ന് ആഡംബര കാറുകള്‍ ഉള്‍പ്പെടെയുള്ള മുപ്പതിലേറെ ഇനങ്ങളുടെ ഇറക്കുമതി തീരുവ പുനഃപരിശോധിക്കാന്‍ ഇന്ത്യ ആലോചിക്കുന്നുവെന്ന റിപ്പോര്‍ട്ടുകള്‍ക്കിടെയാണ് യു.എസിന്റെ പുതിയ തീരുമാനം.

Trump with retaliatory taxes; The trade war is intensifying