മസ്കത്ത്: ഒമാനിലെ വിപണിയിൽ റമദാൻ മുന്നൊരുക്കങ്ങൾ ആരംഭിച്ചിരിക്കുകയാണ്. വ്യാപാരികളെല്ലാം ഇത്തവണ ഏറെ പ്രതീക്ഷയിലാണ്. വ്യപാരം വർധിപ്പിക്കുന്നതിനായി വിപണിയിൽ കൂടുതൽ ഉത്പന്നങ്ങൾ ഇറക്കുമതി ചെയ്യുകയും ആകർഷകമായ ഓഫറുകൾ പ്രഖ്യാപിക്കുകയും ചെയ്തിട്ടുണ്ട്.

യുഎഇയിൽ നിന്നും മറ്റും ആവശ്യമായ സാധനങ്ങൾ ഇറക്കുമതി ചെയ്തിട്ടുണ്ട്. വിപണിയിലെ ഉണർവ് നൽകുന്ന പ്രതീക്ഷയിലാണ് ഇത്തവണ കൂടുതൽ ഉത്പന്നങ്ങൾ ലഭ്യമാക്കിയിരിക്കുന്നതെന്നാണ് വ്യാപാരികൾ പറയുന്നത്. ഹോൾസെയിൽ, റീട്ടെയിൽ കടകളിലെല്ലാം വ്യാപാരം വർധിച്ചിരിക്കുകയാണ്. റമസാനിനോട് അടുക്കുന്നതോടെ കൂടുതൽ ഉപഭോക്താക്കൾ എത്തുമെന്നാണ് പ്രതീക്ഷിക്കുന്നത്. കൂടാതെ, വിലക്കുറവ് ഉൾപ്പെടെയുള്ള നിരവധി ഓഫറുകൾ നൽകി ഉപഭോക്താക്കളെ ആകർഷിക്കാനുള്ള ശ്രമവും വ്യാപാരികൾ നടത്തുന്നുണ്ട്.

അതേസമയം, റമദാൻ വിപണി മുതലെടുത്ത് അവശ്യസാധനങ്ങളുടെ വില വർധിപ്പിച്ചാൽ കർശന നടപടി സ്വീകരിക്കുമെന്ന് അധികൃതർ നേരത്തെ മുന്നറിയിപ്പ് നൽകിയിരുന്നു. നിയമലംഘനങ്ങൾ കണ്ടെത്തുന്നതിനായി എല്ലാ വിൽപന കേന്ദ്രങ്ങളിലും പരിശോധനകൾ ശക്തമാക്കുമെന്നും അറിയിച്ചിട്ടുണ്ട്. റമദാനിൽ കച്ചവടം വർധിക്കുന്നത് മുതലെടുക്കാൻ ചില കച്ചവടക്കാർ ശ്രമിക്കാറുണ്ട്, ഇത്തരം മുതലെടുപ്പുകൾ ഒഴിവാക്കാനാണ് ഈ നടപടി.

ഹൈപ്പർമാർക്കറ്റുകൾ, സൂപ്പർമാർക്കറ്റുകൾ, ചെറുകിട കച്ചവടക്കാർ തുടങ്ങിയവരെല്ലാം തന്നെ ഉപഭോക്താക്കളെ ആകർഷിക്കുന്നതിനായി ഓഫറുകൾ അവതരിപ്പിക്കുന്നുണ്ട്. കാഷ് പ്രൈസുകൾ, ഷോപ്പിങ് വൗച്ചറുകൾ, വിലക്കിഴിവുകൾ എന്നിവയും ഇതിൽ ഉൾപ്പെടുന്നു.

അവശ്യവസ്‌തുക്കൾ കുറഞ്ഞ വിലയിൽ ലഭ്യമാക്കുന്നതിനായി ഉപഭോക്ത്യ സംരക്ഷണ വിഭാഗം റമദാൻ ബാസ്ക്കറ്റ് പദ്ധതി ഇത്തവണയും നടപ്പിലാക്കുന്നുണ്ട്. മുൻ വർഷങ്ങളിൽ ഹൈപ്പർമാർക്കറ്റുകളുമായും സൂപ്പർമാർക്കറ്റുകളുമായും സഹകരിച്ച് ഉപഭോക്താക്കൾക്കായി റമസാൻ കിറ്റ് പുറത്തിറക്കിയിരുന്നു. അന്ന് റമദാൻ ഫുഡ് ബാസ്‌കറ്റ് എന്ന പേരിൽ ആരംഭിച്ച പദ്ധതി വലിയ വിജയമായിരുന്നു. അതിനാലാണ് പൊതുജനങ്ങൾക്ക് ഏറെ പ്രയോജനപ്രദമായ ഈ പദ്ധതി ഇത്തവണയും നടപ്പിലാക്കുന്നത്.

അരി, പഞ്ചസാര, വെജിറ്റബിൾ ഓയിൽ, പാൽപ്പൊടി, അറബിക് കോഫി, ടൊമാറ്റോ പേസ്‌റ്റ്, അരിമാവ്, വെള്ളക്കടല തുടങ്ങിയ ഉൽപന്നങ്ങളാണ് കിറ്റിലുള്ളത്. റമദാനിലേക്ക് ആവശ്യമായ ഭക്ഷ്യവസ്‌തുക്കൾ എളുപ്പത്തിൽ ലഭ്യമാക്കാൻ ഈ പദ്ധതി സഹായിക്കും.

Discover the initiatives taken by Oman to prepare for the Ramzan Food Basket project, aiming to provide essential food items to those in need during the holy month.