മറ്റ് രാജ്യങ്ങളിൽ വാഹനം ഓടിക്കണമെങ്കിൽ ആ രാജ്യത്തെ ലൈസൻസ് വേണ്ടേ എന്നത് പലർക്കുമുള്ള ഒരു സംശയമാണ്. ലൈസൻസ് വേണം എന്ന് തന്നെയാണ് ഉത്തരം. എന്നാൽ, ചില രാജ്യങ്ങൾ ഇന്ത്യൻ ഡ്രൈവിംഗ് ലൈസൻസ് ഉപയോ​ഗിച്ച് വാഹനമോടിക്കാം. എന്നാൽ ചില രാജ്യങ്ങൾ ഇക്കാര്യത്തിൽ ചെറിയ നിബന്ധനകൾ മുന്നോട്ട് വെയ്ക്കുന്നുണ്ട്. മറ്റ് ചില രാജ്യങ്ങളിലാകട്ടെ പ്രത്യേക നിബന്ധനകളൊന്നുമില്ല. ഇന്ത്യൻ ഡ്രൈവിംഗ് ലൈസൻസ് അംഗീകരിക്കുന്ന രാജ്യങ്ങൾ ഏതെല്ലാമാണെന്ന് പരിശോധിക്കാം.

1. ഓസ്ട്രേലിയ
ഇന്ത്യൻ ഡ്രൈവിങ്ങ് ലൈസൻസിന് നിബന്ധനകളോടെ അംഗീകാരം നൽകുന്ന ഒരു രാജ്യമാണ് ഓസ്ട്രേലിയ. ഇംഗ്ലീഷിലുള്ള ഇന്ത്യൻ ലൈസൻസ് കൈവശമുള്ള ഒരു വ്യക്തിക്ക്ക്വീൻസ്ലാൻഡ്, സൗത്ത് ഓസ്ട്രേലിയ,  ന്യൂ സൌത്ത് വെയിൽസ്, ഓസ്ട്രേലിയൻ തലസ്ഥാന മേഖല തുടങ്ങിയ സ്ഥലങ്ങളിൽ വാഹനം ഓടിക്കാൻ സാധിക്കും. 

2. ന്യൂസിലാൻഡ്
ഇന്ത്യൻ ഡ്രൈവിംഗ് ലൈസൻസ് ഉപയോഗിച്ച് വാഹനം ഓടിക്കാൻ സാധിക്കുന്ന ഒരിടമാണ് ന്യൂസിലൻഡ്. അതേസമയം, ചില നിബന്ധനകൾക്ക് വിധേയമാണ്. ഇന്ത്യയിലെ ലൈസൻസ് ഉപയോഗിച്ച് ഒരു വർഷം വരെ മാത്രമേ ന്യൂസിലാൻഡിൽ വാഹനം ഓടിക്കാൻ സാധിക്കു. കൂടാതെ വാഹനം ഓടിക്കുന്നയാൾക്ക് 21 വയസ് പ്രായം വേണം. ഇംഗ്ലീഷിലുള്ള ഇന്ത്യൻ ഡ്രൈവിംഗ് ലൈസൻസും നിർബന്ധമാണ്. 

3. ദക്ഷിണാഫ്രിക്ക
ദക്ഷിണാഫ്രിക്കയും ഇന്ത്യൻ ലൈസൻസ് അംഗീകരിക്കുന്ന ഒരു രാജ്യമാണ്. കാലാവധിയുള്ളതും ഇംഗ്ലീഷിൽ അച്ചടിച്ചതുമായ ഇന്ത്യൻ ലൈസൻസ് ഉപയോഗിച്ച് ദക്ഷിണാഫ്രിക്കയിൽ വാഹനമോടിക്കാൻ സാധിക്കും. 

4. സിം​ഗപ്പൂർ
സിംഗപ്പൂരിൽ വാഹനം ഓടിക്കാൻ സാധാരണയായി വേണ്ടത് ഒരു അന്താരാഷ്ട്ര ഡ്രൈവിംഗ് ലൈസൻസാണ്. അതേസമയം, ഇന്ത്യയിലെ ലൈസൻസിന്റെ ഇംഗ്ലീഷ് പതിപ്പ് കൈവശമുള്ളവർക്ക് സിംഗപ്പൂരിൽ ഒരു വർഷം വരെ വാഹനമോടിക്കാൻ കഴിയും. 

5. സ്വിറ്റ്സർലാൻഡ്
ലോകമെമ്പാടുമുള്ള വിനോദ സഞ്ചാരികളുടെ പ്രിയപ്പെട്ട രാജ്യമാണ് സ്വിറ്റ്സർലാൻഡ്. ഇവിടെയും ഇന്ത്യയിലെ ലൈസൻസ് ഉപയോഗിച്ച് ഒരു വർഷത്തേക്ക് വാഹനം ഓടിക്കാൻ സാധിക്കും. കൂടാതെ, ഇംഗ്ലീഷിലുള്ള ഇന്ത്യൻ ഡ്രൈവിംഗ് ലൈസൻസിന്റെ കോപ്പി കൈവശമുണ്ടെങ്കിൽ ഇവിടെ ഒരു കാർ വാടകയ്ക്ക് എടുക്കാനും സാധിക്കും. 

6. യുണൈറ്റഡ് കിംഘ്ഡം (യുകെ)
യുകെയിൽ ഇന്ത്യൻ ഡ്രൈവിംഗ് ലൈസൻസ് ഉപയോഗിച്ച് ഒരു വർഷം വാഹനം ഓടിക്കാം. അതേസമയം ഒരു നിബന്ധനയുണ്ട്, നിങ്ങളുടെ ഇന്ത്യൻ ഡ്രൈവിംഗ് ലൈസൻസിൽ വ്യക്തമാക്കിയിട്ടുള്ള വാഹന ക്ലാസുകൾ മാത്രമേ ഇവിടെ നിങ്ങൾക്ക് ഓടിക്കാൻ അനുവാദം ലഭിക്കുകയുള്ളൂ. 

7. സ്പെയിൻ
ആവശ്യമായ റസിഡൻസി രജിസ്ട്രേഷൻ പൂർത്തിയാക്കിയതിന് ശേഷം ഇന്ത്യൻ ഡ്രൈവിംഗ് ലൈസൻസ് ഉപയോഗിച്ച് സ്പെയിനിൽ വാഹനമോടിക്കാം. അതേസമയം, ഇതിനായി ചിലപ്പോൾ നിങ്ങളുടെ തിരിച്ചറിയൽ രേഖകൾ ഹാജരാക്കേണ്ടതായി വരാം. 

8. സ്വീഡൻ
സ്വീഡനിലും ഇന്ത്യൻ ലൈസൻസ് ഉപയോ​ഗിച്ച് വാഹനമോടിക്കാം. ഇതിനായി, നിങ്ങളുടെ ലൈസൻസ് സ്വീഡിഷിലോ ഇംഗ്ലീഷിലോ ഫ്രഞ്ചിലോ ജർമ്മനിലോ നോർവീജിയനിലോ അച്ചടിച്ചതാകണമെന്ന നിബന്ധന മാത്രമാണുള്ളത്. 

Explore countries where you can drive using your Indian driving license, making international travel easier and more convenient.