ജയ്പൂർ: ഐപിഎല്ലിലെ കരുത്തരുടെ പോരാട്ടത്തിൽ പഞ്ചാബ് കിങ്‌സും മുംബൈ ഇന്ത്യൻസും നേർക്കുനേർ ഏറ്റുമുട്ടുകയാണ്. ജയ്പൂർ സവായ് മാൻസിംഗ് സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ പഞ്ചാബ് നായകൻ ശ്രേയസ് അയ്യർ ബൗളിംഗ് തെരഞ്ഞെടുക്കുകയായിരുന്നു. ഈ മത്സരം മുംബൈ ക്യാപ്റ്റൻ ഹർദിക് പാണ്ഡ്യക്ക് വളരെ സ്പെഷ്യലാണ്, തന്റെ ടി-20 കരിയറിലെ 300 മത്സരമാണ് ഹർദിക് പഞ്ചാബിനെതിരെ  കളിക്കുന്നത്. ടി-20യിൽ 300 മത്സരങ്ങൾ പൂർത്തിയാക്കുന്ന പതിഞ്ചാമത്തെ ഇന്ത്യൻ താരം കൂടിയാണ് ഹർദിക്. 

 പ്ലേ ഓഫ് യോഗ്യത നേരത്തെ തന്നെ മുംബൈയും പഞ്ചാബും ഉറപ്പിച്ചിരുന്നു. ആദ്യ രണ്ട് സ്ഥാനങ്ങളിൽ ഇടം പിടിച്ച് ക്വാളിഫയർ 1 ഉറപ്പിക്കുക എന്ന ലക്ഷ്യത്തോടെയാണ് ഇന്ന് ഇരു ടീമുകളും ഏറ്റുമുട്ടുന്നത്. ഇന്നലെ ഗുജറാത്ത് പരാജയപ്പെട്ടതോടെ ഇന്ന് ജയിച്ചാൽ മുംബൈക്ക് ക്വാളിഫയർ 1 ഉറപ്പിക്കാനാകും.

ഇന്ന് ജയിച്ചാൽ 18 പോയിന്റോടെ ഒന്നാമതാവും പട്ടികയിൽ മുംബൈയുടെ സ്ഥാനം. നാളെ ബംഗളൂരു ലഖ്‌നൗവിനെ പരാജയപ്പെടുത്തി ഒന്നാം സ്ഥാനത്തെത്തിയാലും മുംബൈ രണ്ടാം സ്ഥാനം ഉറപ്പിക്കും. നിലവിൽ ഗുജറാത്തിനും 18 പോയിന്റുണ്ടെങ്കിലും നെറ്റ് റൺറേറ്റ് കുറവാണ്.

മറുവശത്ത് പഞ്ചാബ് ഇന്ന് ജയിച്ചാൽ 19 പോയിന്റോടെ ഒന്നാമതെത്തും. ഇന്ന് ചെറിയ റൺറേറ്റിൽ പരാജയപ്പെട്ടാലും നാളെ റോയൽ ചലഞ്ചേഴ്‌സ് ബെംഗളൂരു പരാജയപ്പെട്ടാൽ പഞ്ചാബിന് രണ്ടാം സ്ഥാനത്തോടെ ക്വാളിഫയർ 1 ഉറപ്പിക്കാനാകും.

മുംബൈ ഇന്ത്യൻസ് പ്ലെയിങ് ഇലവൻ

 രോഹിത് ശർമ്മ, റയാൻ റിക്കൽടൺ(വിക്കറ്റ് കീപ്പർ), വിൽ ജാക്ക്‌സ്, സൂര്യകുമാർ യാദവ്, തിലക് വർമ്മ, നമാൻ ധിർ, ഹാർദിക് പാണ്ഡ്യ (ക്യാപ്റ്റൻ), മിച്ചൽ സാൻ്റ്‌നർ, ദീപക് ചഹർ, ട്രെൻ്റ് ബോൾട്ട്, ജസ്പ്രീത് ബുംറ.

പഞ്ചാബ് കിംഗ്സ് പ്ലെയിങ് ഇലവൻ

പ്രിയാൻഷ് ആര്യ, ജോഷ് ഇംഗ്ലിസ്(വിക്കറ്റ് കീപ്പർ), നെഹാൽ വധേര, ശ്രേയസ് അയ്യർ (ക്യാപറ്റൻ), മാർക്കസ് സ്റ്റോണിസ്, ശശാങ്ക് സിംഗ്, മാർക്കോ ജാൻസൻ, ഹർപ്രീത് ബ്രാർ, അർഷ്ദീപ് സിംഗ്, കൈൽ ജാമിസൺ.

IPL 2025; Punjab Kings vs Mumbai Indians, Hardik Pandya Played 300 T20 Matches