ദുബൈ: ചൂട് ഉയരുന്ന സാഹചര്യത്തില്‍ കുട്ടികളെ കാറില്‍ ഇരുത്തിപ്പോയാല്‍ കടുത്ത ശിക്ഷ ലഭിക്കുമെന്ന് മുന്നറിയിപ്പ്. പാര്‍ക്ക് ചെയ്തിരിക്കുന്ന കാറിനുള്ളിലെ താപനില പുറത്തെ താപനിലയേക്കാള്‍ 30°C വരെ ഉയരാനിടയുണ്ട്. ഇത് മാരകമായ പ്രത്യാഘാതങ്ങള്‍ക്ക് ഇടയാക്കുമെന്നതിനാലാണ് അധികൃതരുടെ മുന്നറിയിപ്പ്. അടുത്തിടെ മെയ് മാസത്തിലെ ഏറ്റവും ഉയര്‍ന്ന താപനിലയായ 51.6°C, അല്‍ഐനില്‍ രേഖപ്പെടുത്തിയതോടെയാണ് അധികൃതര്‍ രക്ഷിതാക്കള്‍ക്കും വാഹനമോടിക്കുന്നവര്‍ക്കും അപകടങ്ങളെക്കുറിച്ച് മുന്നറിയിപ്പ് നല്‍കിയത്.

വേനല്‍ക്കാലത്ത്, പ്രത്യേകിച്ച് കൊടും ചൂടില്‍, കുട്ടികളെ വാഹനങ്ങളില്‍ തനിച്ചാക്കി ഒറ്റയ്ക്ക് ഇരുത്തരുതെന്ന് അബൂദബി പൊലിസ് താമസക്കാര്‍ക്ക് മുന്നറിയിപ്പ് നല്‍കി.

കുട്ടികളെ വാഹനത്തില്‍ ഒറ്റയ്ക്ക് പൂട്ടിയിടുന്നത് ഓക്‌സിജന്‍ പെട്ടെന്ന് കുറയുന്നതിനും, ചൂടേറ്റ് സ്‌ട്രോക്കിനും, മിനിറ്റുകള്‍ക്കുള്ളില്‍ മരണത്തിനും കാരണമാകുമെന്ന് ഉദ്യോഗസ്ഥര്‍ പറഞ്ഞു. കുട്ടികളെ കാറില്‍ ഒറ്റയ്ക്ക് ഇരുത്തിപ്പോയാല്‍ അവര്‍ എന്തെങ്കിലും അബദ്ധം ചെയ്ത് കൂടുതല്‍ അപകടങ്ങള്‍ സൃഷ്ടിക്കാനുള്ള സാധ്യതയുമുണ്ട്.

കൊടും ചൂടുള്ള സമയങ്ങളില്‍ പൂട്ടിയ കാറില്‍ കുട്ടിയെ തനിച്ചാക്കി പോകുന്നത് യുഎഇ നിയമപ്രകാരം ശിക്ഷാര്‍ഹമാണ്. 

വദീമ നിയമത്തിലെ ആര്‍ട്ടിക്കിള്‍ 35 പ്രകാരം, കോടതിയുടെ വിലയിരുത്തലിനെ ആശ്രയിച്ച് കുറ്റവാളികള്‍ക്ക് തടവും കൂടാതെ/അല്ലെങ്കില്‍ 5,000 ദിര്‍ഹം വരെ പിഴയും ലഭിക്കും. ജീവന് ഭീഷണിയാകുന്ന കൂടുതല്‍ ഗുരുതരമായ കേസുകളില്‍, ശിക്ഷ തടവായും/അല്ലെങ്കില്‍ 10,000 ദിര്‍ഹം വരെ പിഴയായും വര്‍ധിച്ചേക്കാം.

2024-ല്‍, അബൂദബി ഏര്‍ലി ചൈല്‍ഡ്ഹുഡ് അതോറിറ്റിയും (ഇസിഎ) അബൂദബി പബ്ലിക് ഹെല്‍ത്ത് സെന്ററും (എഡിപിഎച്ച്‌സി) സംയുക്തമായി വാഹനങ്ങളിലെ കുട്ടികളുടെ സുരക്ഷാ ഗൈഡ് ' പ്രസിദ്ധീകരിച്ചിരുന്നു. വാഹനങ്ങളിലെ കുട്ടികളുടെ മരണത്തിന് പ്രധാന കാരണം ഹീറ്റ് സ്‌ട്രോക്കാണെന്ന് ഗൈഡ് എടുത്തുകാണിക്കുന്നു. 

ഈ സന്ദര്‍ഭത്തില്‍ ശ്രദ്ധിക്കേണ്ട പ്രധാന കാര്യങ്ങള്‍: 

• കാര്‍ എപ്പോഴും പൂട്ടി, താക്കോലുകള്‍ കുട്ടികള്‍ക്ക് ലഭ്യമാകാത്ത വിധത്തില്‍ സുരക്ഷിതമായി സൂക്ഷിക്കുക.
• കുട്ടികള്‍ വാഹനത്തില്‍ കയറുന്നത് തടയാന്‍ വാഹനം ഒഴിഞ്ഞിരിക്കുമ്പോള്‍ ലോക്ക് ചെയ്തിട്ടുണ്ടെന്ന് ഉറപ്പാക്കുക.
• കാറില്‍ ഒരു കുട്ടിയെ ഒറ്റയ്ക്ക് കണ്ടാല്‍, ഉടന്‍ തന്നെ 999 (പൊലിസ്) അല്ലെങ്കില്‍ 998 (ആംബുലന്‍സ്) എന്ന നമ്പറില്‍ വിളിക്കുക .
• കാറിന്റെ ഉള്‍ഭാഗത്തെ താപനില ഇടയ്ക്കിടെ നിരീക്ഷിക്കുക.
• ലഗേജുകളോ പലചരക്ക് സാധനങ്ങളോ ഇറക്കുന്നതിന് മുമ്പ് കുട്ടികളെ കാറില്‍ നിന്ന് ഇറക്കുന്നതിന് മുന്‍ഗണന നല്‍കുക.

UAE authorities have issued a strict warning against leaving children alone in vehicles, citing serious health risks and legal consequences, including heavy fines and possible imprisonment for violators.