തിരുവനന്തപുരം: തിരുവനന്തപുരത്ത് നടക്കാനിരിക്കുന്ന സ്റ്റാര്‍ട്ട് അപ് ഫെസ്റ്റിവലിലേക്ക് ശശി തരൂരിനെ ക്ഷണിച്ച് ഡി.വൈ.എഫ്.ഐ. മാര്‍ച്ച് 1,2 തിയ്യതികളില്‍ തിരുവനന്തപുരത്താണ് പരിപാടി. അഖിലേന്ത്യ അധ്യക്ഷന്‍ എ എ റഹീം, സംസ്ഥാന സെക്രട്ടറി വി കെ സനോജ്, ഡി.വൈ.എഫ്.ഐ കേന്ദ്ര കമ്മിറ്റി അംഗം എം ഷാജര്‍ എന്നിവര്‍ ഡല്‍ഹിയില്‍ വെച്ച് നേരിട്ടാണ് തരൂരിനെ ക്ഷണിച്ചത്. 

അതേസമയം, സൂറത്തില്‍ പരിപാടി ഉള്ളത് കൊണ്ട് പങ്കെടുക്കാന്‍ ആകില്ലെന്ന് തരൂര്‍ വ്യക്തമാക്കി. പരിപാടിക്ക് തരൂര്‍ ആശംസ നേര്‍ന്നു.

സര്‍ക്കാറിന്റെ വ്യവസായ നയത്തെ പുകഴ്ത്തിയുള്ള തരൂരിന്റെ ലേഖനത്തെ കുറിച്ചുള്ള വിവാദങ്ങളും കോണ്‍ഗ്രസിന്റെ അതൃപ്തിയും തുടരുന്നതിനിടെയാണ് ഡി.വൈ.എഫ്.ഐയുടെ നീക്കം. ലേഖനം വലിയ വിവാദമായതോടെ തരൂരിനെ ഇന്നലെ രാഹുല്‍ഗാന്ധി ഡല്‍ഹിയിലേക്ക് വിളിച്ച് ചര്‍ച്ച നടത്തിയിരുന്നു. 

എ എ റഹീം എം പിയുടെ ഫേസ്ബുക്ക് കുറിപ്പ് 

മവാസോയിലേയ്ക്ക്

ശ്രീ ശശിതരൂര്‍ എം പി യെ ക്ഷണിച്ചു.
ഡി വൈ എഫ് ഐ കേരള സംസ്ഥാന കമ്മിറ്റി സംഘടിപ്പിക്കുന്ന സ്റ്റാര്‍ട്ട് അപ്പ് ഫെസ്റ്റിവലിലേക്ക് ശ്രീ ശശി തരൂരിനെ ക്ഷണിച്ചു. രാജ്യത്തു ആദ്യമായാണ് ഒരു യുവജന സംഘടന സ്റ്റാര്‍ട്ട് അപ്പ് ഫെസ്റ്റിവല്‍ നടത്തുന്നത്.
മാര്‍ച്ച് 1,2 തിയതികളിലാണ് തിരുവനന്തപുരം ടാഗോര്‍ തിയറ്ററില്‍ ഫെസ്റ്റിവല്‍ സംഘടിപ്പിച്ചിരിക്കുന്നത്.
ഡി വൈ എഫ് ഐ യുടെ ഈ ഇടപെടലിനെയും തന്നെ ക്ഷണിക്കാന്‍ കാണിച്ച മനസ്സിനെയും അദ്ദേഹം അഭിനന്ദിച്ചു. വികസന കാര്യത്തില്‍ താന്‍ രാഷ്ട്രീയം നോക്കാറില്ലെന്നും ശ്രീ ശശി തരൂര്‍ പറഞ്ഞു. പങ്കെടുക്കണം എന്ന് ആഗ്രഹമുണ്ടെങ്കിലും ഈ രണ്ടു ദിവസങ്ങളിലും നേരത്തെ നിശ്ചയിച്ച പരിപാടികള്‍ക്കായി യാത്ര ഉള്ളതിനാല്‍ മാവാസോയില്‍ എത്തിച്ചേരാന്‍ സാധിക്കില്ല എന്ന് അദ്ദേഹം അസൗകര്യം അറിയിച്ചു.