മസ്‌കത്ത്: പൈതൃക സസ്യമായ കുന്തിരിക്കമരത്തെ പ്രമേയമാക്കി ഒമാനില്‍ ലോക വന്യജീവി ദിനം ആചരിച്ചു. പരിസ്ഥിതി അതോറിറ്റിയുടെ നേതൃത്വത്തില്‍ വിവിധ ബോധവത്കരണ പരിപാടികളോടെയാണ് ദിനാചരണം സംഘടിപ്പിച്ചത്. പ്രകൃതിയിലെ ജൈവവൈവിധ്യവും ഔഷധ-സുഗന്ധ സസ്യങ്ങളുടെ സംരക്ഷണത്തിന്റെ പ്രാധാന്യവും സമൂഹത്തിന് മുന്നില്‍ എത്തിക്കുക എന്ന ലക്ഷ്യത്തോടെയായിരുന്നു പരിപാടികള്‍.

മനുഷ്യരുടെ ആരോഗ്യം, ജീവിതോപാധി, സാംസ്‌കാരിക പൈതൃകം എന്നിവയുമായി അടുത്ത ബന്ധമുള്ള സസ്യങ്ങളുടെയും വന്യജീവികളുടെയും പ്രാധാന്യം പൊതുസമൂഹത്തിന് ബോധ്യപ്പെടുത്തുക എന്നതാണ് ലോക വന്യജീവി ദിനാചരണത്തിന്റെ പ്രധാന ലക്ഷ്യം. ഈ വര്‍ഷത്തെ ആഗോള പ്രമേയവും ഔഷധസസ്യങ്ങളും സുഗന്ധസസ്യങ്ങളും മനുഷ്യജീവിതത്തില്‍ വഹിക്കുന്ന പങ്കിനെ മുന്നോട്ട് വെക്കുന്നതാണ്.

ഒമാന്റെ ചരിത്രത്തിലും സംസ്‌കാരത്തിലും കുന്തിരിക്കമരത്തിന് പ്രത്യേക സ്ഥാനമുണ്ട്. ആയിരക്കണക്കിന് വര്‍ഷങ്ങളായി ഈ മരത്തില്‍ നിന്ന് ലഭിക്കുന്ന കുന്തിരിക്കം സുഗന്ധവസ്തുക്കളുടെ നിര്‍മ്മാണത്തിനും ധൂപത്തിനും പരമ്പരാഗത ചികിത്സാരീതികള്‍ക്കുമായി ഉപയോഗിച്ചുവരുന്നു. രാജ്യത്തിന്റെ പ്രകൃതിയുമായുള്ള അടുപ്പവും പൈതൃകവുമായി ബന്ധപ്പെട്ട സമ്പന്നമായ ചരിത്രവും പ്രതിഫലിപ്പിക്കുന്ന സസ്യമായി ഇതിനെ കണക്കാക്കപ്പെടുന്നു.

എന്നാല്‍ ഈ പൈതൃകസസ്യങ്ങളുടെ നിലനില്‍പ്പിന് പല വെല്ലുവിളികളും ഉയര്‍ന്നുവരുന്നതായി പരിസ്ഥിതി അതോറിറ്റി മുന്നറിയിപ്പ് നല്‍കി. കാലാവസ്ഥാ വ്യതിയാനം, കീടാക്രമണം, അനിയന്ത്രിതമായ ശേഖരണം, മേയല്‍പ്രവര്‍ത്തനങ്ങള്‍ തുടങ്ങിയവ കുന്തിരിക്കമരങ്ങളുടെ വളര്‍ച്ചക്കും സംരക്ഷണത്തിനും തിരിച്ചടിയാകുന്ന പ്രധാന ഘടകങ്ങളാണ്.

ALSO READ: കര്‍ഷകരും യുവാക്കളും രംഗത്ത്: സൗത്ത് ബാത്തിനയില്‍ തേന്‍ ഉല്‍പാദനം വര്‍ധിച്ചു

ഇത്തരം സാഹചര്യത്തില്‍ സസ്യസമ്പത്ത് സംരക്ഷിക്കാനും ജൈവവൈവിധ്യം നിലനിര്‍ത്താനും കൂടുതല്‍ ശക്തമായ നടപടികള്‍ ആവശ്യമാണെന്നും അധികൃതര്‍ വ്യക്തമാക്കി. പ്രകൃതിയുടെയും പൈതൃകത്തിന്റെയും സംരക്ഷണം എല്ലാവരുടെയും കൂട്ടായ ഉത്തരവാദിത്തമാണെന്നും ദിനാചരണ പരിപാടികളിലൂടെ ഓര്‍മ്മിപ്പിച്ചു.

ലോക വന്യജീവി ദിനം പ്രകൃതിയിലെ ജീവജാലങ്ങളുടെയും സസ്യസമ്പത്തിന്റെയും വിലമതിക്കാനാവാത്ത സംഭാവനകള്‍ സമൂഹത്തിന് ഓര്‍മ്മിപ്പിക്കുന്ന ദിനമായി കണക്കാക്കപ്പെടുന്നു. പ്രകൃതി സംരക്ഷണത്തിന്റെ ആവശ്യകതയെക്കുറിച്ചുള്ള ബോധവത്കരണം ശക്തമാക്കുന്നതിനും ഭാവി തലമുറകള്‍ക്കായി ജൈവവൈവിധ്യം സംരക്ഷിക്കേണ്ടതിന്റെ സന്ദേശം കൈമാറുന്നതിനുമാണ് ഇത്തരം പരിപാടികള്‍ സംഘടിപ്പിക്കുന്നത്.

World Wildlife Day was observed in Muscat, Oman highlighting the conservation of the heritage frankincense (Kunthirikkam) tree. Awareness programs emphasized the importance of medicinal and aromatic plants and the need to protect biodiversity.