കോഴിക്കോട്: താമരശ്ശേരി പുതുപ്പാടി വനമേഖലയിൽ മാവോയിസ്റ്റ് തിരച്ചിലിനിടെ തണ്ടർബോൾട്ട് സംഘത്തിന് കാട്ടുതേനീച്ചയുടെ ആക്രമണമേറ്റു. മേലെ കക്കാട് വനത്തിലാണ് സംഭവം.

ആക്രമണത്തിൽ 12 തണ്ടർബോൾട്ട് സേനാംഗങ്ങൾക്കും ഒരു നാട്ടുകാരനും പരിക്കേറ്റു. പെരുമണ്ണാമൂഴി എസ്‌ഐ ജിതിൻവാസ്, സ്‌പെഷ്യൽ ഓപറേഷൻ ഗ്രൂപ്പ് എസ്‌ഐ ബിജിത്, ഹവിൽദാർ വിജിൻ, കമാൻഡോകൾ ആയ ബിജു, ബിനീഷ്, സുജിത്, ശരത്, ജിതേഷ്, ഡെയ്‌സിൽ, വനിതാ കമാൻഡോകളായ നിത്യ, ശ്രുതി, ദർശിത എന്നിവർക്കും നാട്ടുകാരനായ ബാബുവിനുമാണ് കുത്തേറ്റത്.

പരിക്കേറ്റവരെ ഈങ്ങാപ്പുഴയിലെ സ്വകാര്യ ആശുപത്രിയിൽ പ്രാഥമിക ചികിത്സ നൽകിയ ശേഷം കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.