മുംബൈ: ഇന്ത്യ- പാക് മത്സരത്തിനിടെ ദേശവിരുദ്ധ മുദ്രാവാക്യം മുഴക്കിയെന്ന് ആരോപിച്ച് 15കാരനെ അറസ്റ്റ് ചെയ്തു. അവന്റെ മാതാപിതാക്കളേയും അറസ്റ്റ് ചെയ്തിട്ടുണ്ട്. മാത്രമല്ല  മുസ്‌ലിം കുടുംബത്തിന്റെ വരുമാന മാര്‍ഗമായ കട ബുള്‍ഡോസര്‍ ഉപയോഗിച്ച് തകര്‍ത്തു. മഹാരാഷ്ട്രയിലാണ് സംഭവം. ബുള്‍ഡോസര്‍ രാജിനെതിരായ സുപ്രിം കോടതി ഉത്തരവ് നിലനില്‍ക്കേയാണ് മഹാരാഷ്ട്ര സര്‍ക്കാറിന്റെ നടപടി. മഹാരാഷ്ട്രയിലെ സിന്ധുദുര്‍ഗിലാണ് സംഭവം. കുട്ടിയുടെ പിതാവിന്റെ സഹോദരന്റെ കടയും തകര്‍ത്തിട്ടുണ്ട്.

കഴിഞ്ഞ ഞായറാഴ്ച ഇന്ത്യ-പാകിസ്ഥാന്‍ ക്രിക്കറ്റ് മത്സരത്തിനിടെയാണ് ആരോപിക്കപ്പെടുന്ന സംഭവം.   വിഎച്ച്പി പ്രവര്‍ത്തകനായ സച്ചിന്‍ വരദ്കര്‍ ആണ് കുട്ടിക്കെതിരെ പരാതി നല്‍കി. കുട്ടി ദേശവിരുദ്ധ മുദ്രാവാക്യം വിളിച്ചെന്നായിരുന്നു പരാതി. തുടര്‍ന്ന് പൊലിസ് തിങ്കളാഴ്ച തന്നെ കുട്ടിക്കും മാതാപിതാക്കള്‍ക്കുമെതിരെ എഫ്‌ഐആര്‍ ഫയല്‍ ചെയ്തു. പിന്നാലെ  അറസ്റ്റ് ചെയ്യുകയും ചെയ്തു. പിന്നീട് ബുള്‍ഡോസര്‍ ഉപയോഗിച്ച് ഇവരുടെ കടകള്‍ പൊളിച്ച് കളയുകയായിരുന്നു.

നോട്ടിസോ മുന്നറിയിപ്പോ ഇല്ലാതെയാണ് കടകള്‍ പൊളിച്ചതെന്ന് ദേശീയ മാധ്യമമായ ഇന്ത്യന്‍ എക്‌സ്പ്രസ്സ് റിപ്പോര്‍ട് ചെയ്തു. കുട്ടിയുടെ പിതാവ് നിയമവിരുദ്ധമായി കട നിര്‍മ്മിച്ചുവെന്നാണ് ഇതിന് ന് അധികൃതര്‍ നല്‍കിയ വിശദീകരണം.  ഭൂവുടമയില്‍ നിന്ന് പരാതി ലഭിച്ചുവെന്നും, അതിനാലാണ് കെട്ടിടങ്ങള്‍ പൊളിച്ച് മാറ്റിയതെന്നുന്നും മാല്‍വാന്‍ മുനിസിപ്പല്‍ കൗണ്‍സില്‍ ചീഫ് ഓഫീസര്‍ സന്തോഷ് ജിറാഗെ വിശദീകരിക്കുന്നു. പരാതി ഭൂവുടമയില്‍ നിന്ന് ലഭിച്ചതിനാലാണ് കുട്ടിയുടെ പിതാവിന് നോട്ടിസ് നല്‍കാതിരുന്നതെന്നും വിശദീകരണത്തില്‍ പറയുന്നു. പ്രദേശത്ത് ആളുകള്‍ തടിച്ച് കൂടിയതോടെ നടപടിയെടുക്കാന്‍ നിര്‍ബന്ധിതരായെന്നും തങ്ങളുടെ ചെയ്തിയെ അവര്‍ ന്യായീകരിക്കുന്നു. 

അതേസമയം, കുട്ടിയുടെ പിതാവിന്റേയും സഹോദരന്റേും കടകള്‍ തമ്മില്‍ 50 അടി ദൂരമുണ്ട്. രണ്ടിന്റേയും ഉടമസ്ഥരും വേറെവേറെ ആളുകളാണ്. കൃത്യമായി പണവും വാടകയും നല്‍കിയതാണെന്നും, എന്തിനാണ് കട പൊളിച്ചതെന്ന് അറിയില്ലെന്നും സഹോദരന്‍ പറയുന്നു. 

ചൊവ്വാഴ്ച ജാമ്യം ലഭിച്ചതിനെ തുടര്‍ന്ന്  15 വയസ്സുകാരന്റെ മാതാപിതാക്കളെ ബുധനാഴ്ച സാവന്ത്വാഡി ജയിലില്‍ നിന്ന് മോചിപ്പിച്ചിട്ടുണ്ട്. നിരീക്ഷണ കേന്ദ്രത്തിലേക്ക് കൊണ്ടുപോയ കുട്ടിയെ തിങ്കളാഴ്ച അമ്മാവന് കൈമാറുകയും ചെയ്തു.