ഒല ഇലക്ട്രിക് മൊബിലിറ്റി ലിമിറ്റഡ് 1,000ത്തിലധികം സ്ഥിര/കരാർ തൊഴിലാളികളെ പിരിച്ചുവിടുമെന്ന് ബ്ലൂംബെർഗ് റിപ്പോർട്ട്. സാമ്പത്തിക നഷ്ടം നേരിടുന്ന കമ്പനി ചെലവ് കുറയ്ക്കുന്നതിന്റെയും പ്രവർത്തനക്ഷമത വർദ്ധിപ്പിക്കുന്നതിന്റെയും ഭാഗമായാണ് ഈ നടപടി. ഉപഭോക്തൃ സേവനങ്ങൾ, ചാർജിംഗ് ഇൻഫ്രാസ്ട്രക്ചർ തുടങ്ങിയ വകുപ്പുകളിൽ ജോലികൾ വെട്ടിക്കുറയ്ക്കുമെന്ന് റിപ്പോർട്ടിൽ പറയുന്നു.കഴിഞ്ഞ അഞ്ച് മാസത്തിനിടെ ഇത് രണ്ടാംഘട്ട പിരിച്ചുവിടലാണ് കമ്പിനി നടത്തുന്നത്; 2024 നവംബറിൽ ഏകദേശം 500 ജീവനക്കാരെ കമ്പനി പുറത്താക്കിയിരുന്നു.

നിലവിൽ 4,000ത്തോളം ജീവനക്കാരുള്ള ഒല, ഫെബ്രുവരിയിൽ രണ്ട് ഏജൻസികളുമായി വീണ്ടും ചര്‍ച്ച നടത്താനിരിക്കുകയാണെന്നും ഇത് വാഹന രജിസ്‌ട്രേഷനിൽ പ്രതിഫലിക്കാമെന്നും കമ്പനി നിക്ഷേപകരെ അറിയിച്ചിട്ടുണ്ട്.

ഭവിഷ് അഗർവാളിന്റെ നേതൃത്വത്തിലുള്ള ഒലയുടെ നഷ്ടം 2024 ഡിസംബർ പാദത്തിൽ 50% വർദ്ധിച്ച് ₹564 കോടി രൂപയായി. മുൻവർഷം ഇതേ കാലയളവിൽ നഷ്ടം ₹376 കോടി ആയിരുന്നു. ഒരിക്കൽ ഇന്ത്യയിലെ മുൻനിര ഇ-സ്കൂട്ടർ ബ്രാൻഡായിരുന്ന ഒല, വിപണിയിലെ കടുത്ത മത്സരം കാരണം പിന്നോട്ടുപോയി. 2024 ഡിസംബറിൽ ബജാജ് ഓട്ടോ ലിമിറ്റഡ് ഒലയെ മറികടന്ന് ഒന്നാം സ്ഥാനത്തെത്തി, കൂടാതെ ടിവിഎസ് മോട്ടോരും ഓലയെ പിന്തള്ളിയിട്ടുണ്ട്.

2025 ഫെബ്രുവരിയിൽ ഒല 25,000 യൂണിറ്റിലധികം സ്കൂട്ടറുകൾ വിൽപ്പന നടത്തിയതായിട്ടാണ് കണക്ക്. 28% വിപണി വിഹിതം ഇപ്പോഴും ഒലയുടെ പക്കലിലുണ്ട്.2024 ഓഗസ്റ്റിൽ ഓഹരി വിപണിയിൽ ലിസ്റ്റ് ചെയ്തതിനുശേഷം ഏറ്റവും ഉയർന്ന നിലയിൽ നിന്ന് ഒല ഇലക്ട്രിക്കിന്റെ ഓഹരികൾ 60%ത്തോളം ഇടിഞ്ഞു. ഇന്ന് മാത്രം 3.25%ത്തോളം ഓഹരി മൂല്യം കുറഞ്ഞിട്ടുണ്ട്.