കുവൈത്ത് സിറ്റി: 15 വര്‍ഷം കൃത്യമായി ശമ്പളം വാങ്ങുകയും എന്നാല്‍ ജോലിക്ക് ഹാജരാകാതിരിക്കുകയും ചെയ്ത ഡോക്ടര്‍ക്ക് കുവൈത്തില്‍ അഞ്ചു വര്‍ഷം തടവു ശിക്ഷ. ജോലിക്ക് ഹാജരാകാത്തതിനു പുറമേ, മറ്റൊരു രാജ്യത്താണ് ഇയാള്‍ 15 വര്‍ഷവും ജീവിച്ചതെന്നും അന്വേഷണത്തില്‍ കണ്ടെത്തി. 

15 വര്‍ഷത്തിലേറെയായി വിദേശത്തായിരുന്ന ഇയാള്‍ ബാങ്ക് അക്കൗണ്ട് വഴിയാണ് ശമ്പളം വാങ്ങിയിരുന്നത്. മാനസികാരോഗ്യ വിദഗ്ധനായ ഡോക്ടര്‍ക്കാണ് ക്രിമിനല്‍ കോടതി അഞ്ചു വര്‍ഷത്തെ തടവും ഒരു മില്ല്യണ്‍ കുവൈത്തി ദീനാര്‍ പിഴയും വിധിച്ചിരിക്കുന്നത്.

ആരോഗ്യ മന്ത്രാലയത്തിലെ നിയമ വകുപ്പിന്റെ കണക്കനുസരിച്ച് ഇയാള്‍ രാജ്യത്തിന് പുറത്തായതിനാല്‍ 15 വര്‍ഷമായി ജോലിയില്‍ നിന്ന് വിട്ടുനില്‍ക്കുകയാണ്. എന്നിട്ടും മന്ത്രാലയത്തിലെ മറ്റൊരു ജീവനക്കാരനുമായി ഒത്തുചേര്‍ന്നാണ് അദ്ദേഹത്തിന് മുഴുവന്‍ ശമ്പളവും നേടിയെടുത്തത്. തല്‍ഫലമായി പബ്ലിക് പ്രോസിക്യൂഷനില്‍ ഒരു റിപ്പോര്‍ട്ട് സമര്‍പ്പിക്കുകയും ആഭ്യന്തര മന്ത്രാലയത്തിലെ ക്രിമിനല്‍ ഇന്‍വെസ്റ്റിഗേഷന്‍സ് വകുപ്പ് അന്വേഷണം നടത്തുകയും ചെയ്തു.
 
15 വര്‍ഷം വിദേശ രാജ്യത്ത് ജീവിച്ച് ശമ്പളം തട്ടിയ പ്രതി ഇപ്പോഴും വിദേശത്തു തുടരുകയാണെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ഏതുവിധേനയും ഇയാളെ നാട്ടിലേക്ക് മടക്കികൊണ്ടുവരാനുള്ള ശ്രമങ്ങള്‍ തുടരുകയാണ്.

15 years of salary without work; Kuwaiti doctor jailed for 5 years