ഏകദിനത്തിലെ എക്കാലത്തെയും മികച്ച അഞ്ച് താരങ്ങളെ തെരഞ്ഞെടുത്തിരിക്കുകയാണ് മുൻ സൗത്ത് ആഫ്രിക്കൻ താരം എബി ഡിവില്ലിയേഴ്സ്. റിക്കി പോണ്ടിങ്, സച്ചിൻ ടെണ്ടുൽക്കർ, ജാക്വസ് കാലിസ്, വിരാട് കോഹ്‌ലി, എംഎസ് ധോണി എന്നിവരെയാണ് മുൻ സൗത്ത് ആഫ്രിക്കൻ താരം തെരഞ്ഞെടുത്തത്. 

1995 മുതൽ 2012 വരെ ഓസ്ട്രേലിയൻ ടീമിനൊപ്പം ഐതിഹാസികമായ ക്രിക്കറ്റ്‌ കരിയറാണ് പോണ്ടിങ് പടുത്തുയർത്തിയത്. ഓസ്ട്രേലിയക്കായി 375 ഏകദിന മത്സരങ്ങളിൽ നിന്നും 13704 റൺസാണ് പോണ്ടിങ് നേടിയിട്ടുള്ളത്. 30 സെഞ്ച്വറികളും 82 അർദ്ധ സെഞ്ച്വറികളുമാണ്‌ താരം വൈറ്റ് ബോൾ ക്രിക്കറ്റിൽ നേടിയിട്ടുള്ളത്.

സൗത്ത് ആഫ്രിക്കൻ ക്രിക്കറ്റിലെ ഏറ്റവും മികച്ച ഓൾ റൗണ്ടർമാരിൽ ഒരാളാണ് കാലിസ്. 328 ഏകദിന മത്സരങ്ങളിൽ നിന്നും 17 സെഞ്ച്വറികളും 86 അർദ്ധ സെഞ്ച്വറികളും ഉൾപ്പെടെ 11579 റൺസാണ് കാലിസ് നേടിയിട്ടുള്ളത്. സൗത്ത് ആഫ്രിക്കക്ക്‌ ആദ്യ ഐസിസി കിരീടം നേടിക്കൊടുത്തതും കാലിസ് തന്നെയാണ്. 1998ലെ ചാമ്പ്യൻസ് ട്രോഫിയായിരുന്നു സൗത്ത് ആഫ്രിക്ക നേടിയത്. 

1989 മുതൽ 2012 വരെ  ഇന്ത്യൻ ക്രിക്കറ്റിൽ ഏകദിന ഫോർമാറ്റിൽ വലിയ സ്വാധീനം ചെലുത്തിയ താരമാണ്‌ സച്ചിൻ. 463 മത്സരങ്ങളിൽ നിന്നും 49 സെഞ്ച്വറികളും 96 ഫിഫ്റ്റികളും ഉൾപ്പടെ 18426 റൺസാണ് സച്ചിൻ നേടിയത്. ഇന്ത്യക്കായി 350 ഏകദിന മത്സരങ്ങളിൽ നിന്നും 10773 റൺസാണ് ധോണി നേടിയിട്ടുള്ളത്. 10 സെഞ്ച്വറികളും 73 അർദ്ധ സെഞ്ച്വറികളുമാണ്‌ താരം വൈറ്റ് ബോൾ ക്രിക്കറ്റിൽ നേടിയിട്ടുള്ളത്. കോഹ്‌ലി ഇതിനോടകം തന്നെ 301 ഏകദിന മത്സരങ്ങളിൽ നിന്നും 51 സെഞ്ച്വറികളും 74 അർദ്ധ സെഞ്ച്വറികളും ആണ് നേടിയിട്ടുള്ളത്. 14180 റൺസും താരം ഇതുവരെ ഏകദിനത്തിൽ അടിച്ചെടുത്തിട്ടുണ്ട്.

ഇപ്പോൾ നടന്നുകൊണ്ടിരിക്കുന്ന ഐസിസി ചാമ്പ്യൻസ് ട്രോഫിയിൽ മിന്നും പ്രകടനമാണ് കോഹ്‌ലി കാഴ്ചവെച്ചുകൊണ്ടിരിക്കുന്നത്. ഇതിനോടകം തന്നെ നാല് മത്സരങ്ങളിൽ നിന്നും 214 റൺസാണ് കോഹ്‌ലി നേടിയിട്ടുള്ളത്. ഒരു സെഞ്ച്വറിയും അർദ്ധ സെഞ്ച്വറിയും കോഹ്‌ലി നേടിയിട്ടുണ്ട്. നാളെയാണ് ചാമ്പ്യൻസ് ട്രോഫിയുടെ ഫൈനൽ മത്സരം നടക്കുന്നത്. ദുബായ് ഇന്റർനാഷണൽ സ്റ്റേഡിയത്തിൽ നടക്കുന്ന മത്സരത്തിൽ ഇന്ത്യയും ന്യൂസിലാൻഡുമാണ് നേർക്കുനേർ എത്തുന്നത്.