റിയാദ്: വ്യാജ മെഡിക്കൽ ലീവ് റിപ്പോർട്ടുകൾ സമർപ്പിക്കുന്നത് ക്രിമിനൽ കുറ്റമാണെന്നും ഒരു വർഷം വരെ തടവും 100,000 റിയാൽ (26,600 ഡോളർ) പിഴയും ലഭിക്കാവുന്ന കുറ്റമാണിതെന്നും സഊദി ആരോഗ്യ മന്ത്രാലയം മുന്നറിയിപ്പ് നൽകി.

അനധികൃത മെഡിക്കൽ ലീവ് ലഭ്യമാകുന്ന പ്ലാറ്റ്ഫോമുകൾ ഉയർത്തുന്ന ആശങ്ക  വർധിച്ചുവരുന്ന സാഹചര്യത്തിലാണ് ഈ മുന്നറിയിപ്പ്. ഇത്തരം സേവനങ്ങൾ നൽകുന്ന പ്ലാറ്റ്ഫോമുകൾ നിയമവിരുദ്ധവും പ്രോസിക്യൂഷന് വിധേയവുമാണെന്ന് ചൂണ്ടിക്കാട്ടി മന്ത്രാലയം പൊതുജനങ്ങളോട് ഇത്തരം സേവനങ്ങൾ ഒഴിവാക്കണമെന്ന് അഭ്യർത്ഥിച്ചു.

"സെഹ്ഹാട്ടി പ്ലാറ്റ്‌ഫോമിന് മാത്രമേ ഔദ്യോഗിക അസുഖ അവധി റിപ്പോർട്ടുകൾ നൽകാൻ അധികാരമുള്ളൂ, മറ്റ് മാർഗങ്ങളിലൂടെ ലഭിക്കുന്ന ഏതൊരു റിപ്പോർട്ടും അസാധുവായി കണക്കാക്കുകയും നിയമനടപടികൾക്ക് വിധേയമാക്കുകയും ചെയ്യും." മന്ത്രാലയം ഒരു പ്രസ്താവനയിൽ പറഞ്ഞു. 

മെഡിക്കൽ ലീവിന്റെ ദുരുപയോഗം തടയുന്നതിനായി, ആരോഗ്യ മന്ത്രാലയം അധികൃതർ മെഡിക്കൽ ലീവ് റിപ്പോർട്ടുകൾ രോഗികളുടെ ആരോഗ്യ രേഖകളുമായി ക്രോസ് ചെക്ക് ചെയ്യുന്ന ഒരു ഡിജിറ്റൽ മോണിറ്ററിംഗ് സംവിധാനം അവതരിപ്പിച്ചിട്ടുണ്ട്. നിയമങ്ങൾ അനുസരിക്കുന്ന പ്രവണത ശക്തിപ്പെടുത്തുന്നതിനും വഞ്ചനാപരമായ ക്ലെയിമുകൾ പെട്ടെന്നു തന്നെ കണ്ടെത്തുന്നതിനുമായാണ് ഈ സംവിധാനം അവതരിപ്പിച്ചിരിക്കുന്നത്.

ആരോഗ്യ മേഖലയിൽ പ്രവർത്തിക്കുന്നവരുടെ ധാർമ്മികവും നിയമപരവുമായ ബാധ്യതകളെക്കുറിച്ച് മന്ത്രാലയം മുന്നറിയിപ്പ് നൽകി. മെഡിക്കൽ ന്യായീകരണമില്ലാതെ അസുഖ അവധി നൽകുന്ന ഡോക്ടർമാർ അച്ചടക്കപരവും നിയമപരവുമായ പ്രത്യാഘാതങ്ങൾ നേരിടേണ്ടിവരുമെന്നും മന്ത്രാലയം മുന്നറിയിപ്പ് നൽകി.

100,000 riyal fine and prison sentence for submitting fake medical leave reports in saudi arabia