ഡൽഹി: റിസർവ് ബാങ്ക് നൂറിൻ്റെയും ഇരുന്നൂറിൻ്റെയും പുതിയ നോട്ടുകൾ പുറത്തിറക്കാനൊരുങ്ങുന്നു. കഴിഞ്ഞ ഡിസംബറിൽ മുൻ റിസർവ്വ് ബാങ്ക് ​ഗവർണർ ശക്തികാന്ത ദാസിൻ്റെ പിൻഗാമിയായി നിയമിതനായ ആർബിഐ ഗവർണർ സഞ്ജയ് മൽഹോത്രയുടെ ഒപ്പിട്ട 100,200 രൂപയുടെ പുതിയ നോട്ടുകളാണ് പുറത്തിറക്കുക. റിസർവ് ബാങ്കിന്റെ 26ാമത് ഗവർണറാണ് സഞ്ജയ് മൽഹോത്ര.

നിലവിലുള്ള നോട്ടിന്റെ തുടർച്ച തന്നെയായിരിക്കും പുതിയ നോട്ടുകൾ. മുമ്പ് പുറത്തിറക്കിയ എല്ലാ 100,200 രൂപ നോട്ടുകളും ഇപ്പോഴും നിയമപരമായ കറൻസിയാണെന്നും സാധുതയുമുള്ളതായിരിക്കുമെന്നും ആർബിഐ അറിയിച്ചു. വിപണിയില്‍ കൂടുതൽ നോട്ടുകൾ എത്തിച്ച് പണപ്പെരുപ്പം നിയന്ത്രിക്കുകയും സാമ്പത്തിക ഒഴുക്ക് ഉറപ്പാക്കുകയും ചെയ്യുന്നതിനാണ് പുതിയ നോട്ടുകൾ പുറത്തിറക്കുന്നതെന്ന് റിസർവ് ബാങ്ക് വ്യക്തമാക്കി.

സുരക്ഷ വർധിപ്പിക്കാനും കള്ളപ്പണം തടയാനും നേരത്തെ അവതരിപ്പിച്ച പുതിയ സീരീസ് നോട്ടുകളുടെ മാതൃകയിൽ തന്നെയാണ് പുതിയ 100,200 നോട്ടുകളും രൂപകൽപ്പന ചെയ്യുക. കൂടാതെ, നോട്ടിന്റെ മുൻവശത്ത് മഹാത്മാഗാന്ധിയുടെ ഛായാചിത്രവും പിന്നിൽ സാംസ്കാരിക ചിഹ്നങ്ങളും ഉണ്ടാകും. അതേസമയം, ആർബിഐ ഗവർണറുടെ ഒപ്പിൽ മാത്രമാണ് മാറ്റമുണ്ടാകുക. പുതിയ നോട്ടിൽ പുതിയ ആർബിഐ ഗവർണർ സഞ്ജയ് മൽഹോത്രയുടെ ഒപ്പായിരിക്കും ഉണ്ടാകുക. മറ്റ് പരിഷ്കാരങ്ങളൊന്നും ആർബിഐ വ്യക്തമാക്കിയിട്ടില്ല. 

നോട്ടുകളിൽ ഗവർണറുടെ ഒപ്പ് മാറ്റുന്നത് റിസർവ്വ് ബാങ്കിന്റെ പതിവ് നടപടിക്രമങ്ങളിലൊന്നാണ്. പുതിയ ഗവർണർ ചുമതലയേൽക്കുമ്പോൾ, ആർബിഐ പഴയ നോട്ടുകൾ പ്രചാരത്തിൽ തുടരാൻ അനുവദിക്കുകയും ഒപ്പം പുതിയ ഗവർണർ ഒപ്പിട്ട നോട്ടുകൾ പുറത്തിറക്കുകയും ചെയ്യുന്നു.

The Reserve Bank of India (RBI) is set to issue new ₹100 and ₹200 banknotes featuring the signature of its 26th Governor, Sanjay Malhotra. Malhotra, who succeeded Shaktikanta Das in December, will have his signature on the new series of Mahatma Gandhi banknotes.