കൊച്ചി: വാടക ഗർഭപാത്രത്തിലൂടെ അമ്മയാകാനുള്ള അവകാശം സ്ത്രീകൾക്ക് 51 വയസ് തികയുന്നതിന്റെ തലേന്ന് വരെ നിലനിൽക്കുന്നുവെന്ന് ഹൈക്കോടതി വ്യക്തമാക്കി. നേരത്തെ, 50 വയസ് തികഞ്ഞതിനാൽ അനുമതി നിഷേധിച്ച സിംഗിൾ ബെഞ്ച് ഉത്തരവ് ചീഫ് ജസ്റ്റിസ് നിതിൻ ജാംദാർ, ജസ്റ്റിസ് എസ്. മനു എന്നിവരടങ്ങിയ ഡിവിഷൻ ബെഞ്ച് റദ്ദാക്കി.

കണ്ണൂർ സ്വദേശികളായ ദമ്പതികൾ വാടക ഗർഭപാത്രത്തിലൂടെ മാതൃത്വം കൈവരിക്കാൻ അനുമതി തേടിയ കേസിലാണ് ഹൈക്കോടതിയുടെ ഈ നിർണായക വിധി. സ്ത്രീകൾക്ക് 23 മുതൽ 50 വയസ്സുവരെയും പുരുഷന്മാർക്ക് 26 മുതൽ 55 വയസ്സുവരെയുമാണ് വാടക ഗർഭധാരണത്തിന് നിയമപരമായ പ്രായപരിധിയെന്ന് കോടതി വ്യക്തമാക്കി. എന്നാൽ, 51 വയസ് തികയുന്നതിന്റെ തലേന്ന് വരെയും സ്ത്രീകൾക്ക് ഈ അവസരം ലഭിക്കുമെന്ന് ഡിവിഷൻ ബെഞ്ച് വ്യക്തമാക്കി.

ഹർജിക്കാരിയുടെ സ്കൂൾ രേഖയിൽ 1974 ജൂൺ 21 ആയിരുന്നു ജനനത്തീയതി, ഇതിന്റെ അടിസ്ഥാനത്തിൽ സറോഗസി ബോർഡ് അനുമതി നിഷേധിച്ചു. എന്നാൽ, ആധാർ, പാസ്‌പോർട്ട്, ഡ്രൈവിംഗ് ലൈസൻസ് തുടങ്ങിയ രേഖകളിൽ 1978 ജൂൺ 21 എന്നായിരുന്നു ജനനത്തീയതി. ഈ ഭേദഗതി പരിഗണിക്കാതെ അനുമതി നിഷേധിച്ചതിനെതിരെ ദമ്പതികൾ ഹൈക്കോടതിയെ സമീപിച്ചു.

പ്രായം കണക്കാക്കാൻ സ്കൂൾ രേഖ വിശ്വാസ്യതയുള്ളതാണെന്നും അതനുസരിച്ചായിരിക്കണമെന്ന് കോടതി വ്യക്തമാക്കി. 50 വയസെന്നത് 51 വയസ് തികയുന്നതിന് മുൻപുള്ള മുഴുവൻ കാലയളവും ഉൾക്കൊള്ളുന്നതാണെന്ന് നിർവചിച്ചു. നിയമങ്ങളുടെ വ്യാഖ്യാനം ജനങ്ങളുടെ അവകാശങ്ങൾക്കു ഹാനികരമായിരിക്കരുതെന്നും അതിന് ദുര്‍വ്യാഖ്യാനമാകാൻ പാടില്ലെന്നുമാണ് ഡിവിഷൻ ബെഞ്ചിന്റെ നിരീക്ഷണം. ‌ ഹർജിക്കാർക്ക് ഒരാഴ്ചയ്ക്കകം യോഗ്യത സർട്ടിഫിക്കറ്റ് നൽകാൻ കോടതി നിർദേശിച്ചു.