കുരങ്ങന്‍മാരുടെ വികൃതികള്‍ കാരണം മനുഷ്യര്‍ക്ക് പലതും നഷ്ടപ്പെടാറുണ്ട്. ചില സമയങ്ങളില്‍ ഇവര്‍ ശല്യക്കാരായും മാറുന്നത് കാണാം. ആളുകളുടെ കൈയില്‍ എന്തു കണ്ടാലും തട്ടിപ്പറിക്കാന്‍ മിടുക്കന്‍മാരാണ് ഇവര്‍. എവിടേക്ക് യാത്രതിരിച്ചാലും ആളുകള്‍ പറയുന്ന ഒരു കാര്യമുണ്ട്. കുരങ്ങന്‍മാര്‍ ഉണ്ടാവും. നന്നായി ശ്രദ്ധിക്കണമെന്ന്. കാരണം കൈയിലെ ഫോണും കണ്ണടയും എന്നുവേണ്ട വില പിടിപ്പുള്ള എന്തും എടുത്തോണ്ട് പോവുമെന്ന്. അങ്ങനെയുള്ള കുറേ വിഡിയോസും നമ്മള്‍ കാണുന്നതാണ്.

അതുപോലെ ഒരു വിഡിയോയാണ് ഇപ്പോള്‍ വൈറലായിരിക്കുന്നത്. സാംസങ്ങിന്റെ ഒരു ഫോണാണ് കുരങ്ങന്‍ തട്ടിപ്പറിച്ച് കൊണ്ടുപോയത്. നേരെ കെട്ടിടത്തിന്റെ മുകളിലേക്ക് ഫോണുമായി കയറിപ്പോവുകയും ചെയ്തു. സാംസങ് എസ് 25 അള്‍ട്ര ഫോണായിരുന്നു കുരങ്ങന്‍ എടുത്തത്. 

ഫോണുമായി മുകളിലേക്കു കയറിപ്പോയ കുരങ്ങനെ താഴെ നിന്നു ആളുകള്‍ നോക്കുന്നതും വിഡിയോയില്‍ കാണാം. എന്നാല്‍ രസകരമായത് അതൊന്നുമല്ല. ഫോണ്‍തിരിച്ചു കിട്ടാന്‍ വേണ്ടി ഇവര്‍ കുരങ്ങനു മാംഗോ ജ്യൂസിന്റെ ഒരു പാക്കറ്റ് മുകളിലേക്കെറിഞ്ഞു കൊടുത്തു. അത് കൈയില്‍ കിട്ടിയ കുരങ്ങന്‍ തിരിച്ച് ഫോണും താഴേയ്ക്ക് എറിഞ്ഞുകൊടുത്തു. താഴെ നില്‍ക്കുന്നവര്‍ അത് വാങ്ങുകയും എല്ലാവരും ചിരിക്കുകയും ചെയ്യുന്നുണ്ട്.

കാര്‍ത്തിക് രാതൗഡ് എന്ന യൂസറാണ് രസകരമായ വിഡിയോ പങ്കുവച്ചിരിക്കുന്നത്. നിരവധി പേര്‍ വിഡിയോ കാണുകയും രസകരമായ കമന്റുകള്‍ അഭിപ്രായപ്പെടുത്തുകയും ചെയ്തു. കുരങ്ങന്‍ ആള് പൊളിയാണെന്നും അവനു വേണ്ടത് കൃത്യമായി അവനറിയാമെന്നും ഒക്കെയാണ് കമന്റുകള്‍ ഉള്ളത്.