ദുബൈ: നിയമവിരുദ്ധമായി 12 പേരെ ജോലിക്കു നിയമിച്ച പ്രവാസിയടക്കം രണ്ടു പേര്‍ക്ക് 600,000 ദിര്‍ഹം പിഴ ചുമത്തി യുഎഇ കോടതി. ഫെബ്രുവരിയില്‍ നടത്തിയ പരിശോധനയിലാണ് ഇരുവരും അറസ്റ്റിലായത്. 12 തൊഴിലാളികള്‍ക്കും 1,000 ദിര്‍ഹം പിഴ ചുമത്തി രാജ്യത്ത് നിന്നും നാടുകടത്തി.

കഴിഞ്ഞ മാസം റെസിഡന്‍സി നിയമ ലംഘകരെ പിടികൂടുന്നതിനായി 252 പരിശോധനകള്‍ നടത്തിയതായി ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് ആന്‍ഡ് പോര്‍ട്ട്‌സ് സെക്യൂരിറ്റി (ഐസിപി) വെളിപ്പെടുത്തി. 4,771 സ്ഥാപനങ്ങള്‍ പരിശോധിച്ചപ്പോള്‍ എത്ര പേരെ അറസ്റ്റ് ചെയ്തതായി അതോറിറ്റി പറഞ്ഞു.

നിയമലംഘനങ്ങളില്‍ പെര്‍മിറ്റ് ഇല്ലാതെ തൊഴിലാളികളെ ജോലിയില്‍ നിയമിക്കുക, ഒരേ സമയം രണ്ടു കമ്പനിയില്‍ ജോലി ചെയ്യുക എന്നിവ ഉള്‍പ്പെടുന്നു.

അറസ്റ്റിലായവരെ തുടര്‍ന്നുള്ള നിയമനടപടികള്‍ക്കായി ബന്ധപ്പെട്ട അധികാരികള്‍ക്ക് കൈമാറിയതായി ഐസിപി ഡയറക്ടര്‍ ജനറല്‍ മേജര്‍ ജനറല്‍ സുഹൈല്‍ സയീദ് അല്‍ ഖൈലി പറഞ്ഞു. കോടതി വിധികളുടെ അടിസ്ഥാനത്തില്‍, നിയമലംഘകര്‍ക്കും അവരെ ജോലിക്കെടുത്തവര്‍ക്കും പിഴ ചുമത്തുകയും ചിലരെ നാടുകടത്തുകയും ചെയ്തതായും അദ്ദേഹം അറിയിച്ചു.

നിയമവിരുദ്ധമായി ഒരു തൊഴിലാളിയെ ജോലിക്കെടുക്കുകയോ താമസിപ്പിക്കുകയോ ചെയ്താല്‍ 50,000 ദിര്‍ഹം വരെ പിഴ ചുമത്തുമെന്ന് അധികൃതര്‍ മുന്നറിയിപ്പ് നല്‍കി. ജോലി നല്‍കാതെയും മറ്റ് കമ്പനികളില്‍ ജോലി ചെയ്യാന്‍ അനുവദിക്കാതെയും തൊഴിലാളികളെ റിക്രൂട്ട് ചെയ്യുന്നതിനും ഇതേ ശിക്ഷ ബാധകമാണ്. ആവര്‍ത്തിച്ചുള്ള കുറ്റകൃത്യങ്ങള്‍ക്ക് ഇരട്ടി ശിക്ഷയാണ് നിയമലംഘകരെ കാത്തിരിക്കുന്നത്.

കമ്പനികളും വ്യക്തികളും നിയമനങ്ങള്‍ നടത്തുമ്പോള്‍ റെസിഡന്‍സി നിയമം പാലിക്കണമെന്ന് മേജര്‍ ജനറല്‍ അല്‍ ഖൈലി ആവശ്യപ്പെട്ടു. കരാറില്ലാതെ തൊഴിലാളികളെ നിയമിക്കുന്നത് ഒഴിവാക്കണമെന്നും അദ്ദേഹം അഭ്യര്‍ത്ഥിച്ചു.

ജനുവരിയില്‍ മാത്രം റെസിഡന്‍സി നിയമം ലംഘിച്ച 6,000 പേരെയാണ് ഐസിപി അറസ്റ്റു ചെയ്തത്. ഇവരില്‍ ഭൂരിഭാഗം പേരെയും നാടുകടത്തിയിരുന്നു. കഴിഞ്ഞ വര്‍ഷം സെപ്റ്റംബര്‍ 1 മുതല്‍ ഡിസംബര്‍ 31 വരെയുള്ള ഗ്രേസ് പിരീഡ് കാലയളവില്‍ നിയമലംഘകര്‍ക്ക് വിലക്ക് കൂടാതെ രാജ്യം വിടാനോ പുതിയ തൊഴില്‍ കരാര്‍ നേടാനോ നിയമപരമായി യുഎഇയില്‍ തുടരാനോ അനുവാദമുണ്ടായിരുന്നു.

Two have been fined Dh600,000 for illegally employing 12 workers in the UAE