കൊല്ലം: മയ്യനാട് താന്നി ബിഎസ്എൻഎൽ ഓഫീസിന് സമീപം വാടകയ്ക്ക് താമസിക്കുകയായിരുന്ന ഭാസ്‌കരവിലാസം വീട്ടിൽ അജീഷ് (38), സുമ (36) ആദി (2) എന്നിവരെ മരിച്ച നിലയിൽ കണ്ടെത്തി. കുഞ്ഞിനെ കൊലപ്പെടുത്തി ദമ്പതികൾ ആത്മഹത്യ ചെയ്യുകയായിരുന്നു. 

രാവിലെ പതിവ് സമയം കഴിഞ്ഞിട്ടും  ഇവർ മുറി തുറക്കാതിരുന്നതിനെ തുടർന്ന് അജീഷിന്റെ മാതാപിതാക്കൾ നോക്കിയപ്പോഴാണ് അപകടം മനസ്സിലായത്. സംഭവ സമയത്ത് അജീഷ് കുമാറിന്റെ മാതാപിതാക്കൾ വീട്ടിലുണ്ടായിരുന്നു. ഇവരുടെ നിലവിളി കേട്ട് നാട്ടുകാർ എത്തിയാണ് മുറി ചവിട്ടി തുറന്നത്. കുട്ടിയുടെ ശരീരം കട്ടിലിലും സമീപത്ത് തന്നെ അജീഷും സുമയും തൂങ്ങിമരിച്ച നിലയിലുമായിരുന്നു.

ഗൾഫിൽ ജോലി ചെയ്തിരുന്ന അജീഷ് ഒരു വർഷം മുമ്പാണ് നാട്ടിലേക്ക് മടങ്ങിയത്. ഇതിനിടയിൽ സാമ്പത്തിക പ്രതിസന്ധി രൂക്ഷമാകുകയും അടുത്തിടെ അജീഷിന് അർബുദം സ്ഥിരീകരിക്കുകയും ചെയ്തിരുന്നു. ഇതിന്റെ ചികിത്സയ്ക്കും കുഞ്ഞിന്റെ ആരോഗ്യ പ്രശ്നങ്ങൾക്കുമായി കുടുംബം കടുത്ത സാമ്പത്തിക ബുദ്ധിമുട്ടുകൾ നേരിടുകയായിരുന്നു. കടങ്ങൾ ആഴത്തിലായതോടെ കടുത്ത മാനസിക സമ്മർദത്തിലായിരുന്നുവെന്ന് ബന്ധുക്കളും അയൽവാസികളും പറഞ്ഞു. ഇതെല്ലാമാണ് കുടുംബത്തെ ആത്മഹത്യയിലേക്ക് നയിച്ചെന്നാണ് വിവരം. 

(ശ്രദ്ധിക്കുക: ആത്മഹ‌ത്യ ഒന്നിനും പരിഹാരമല്ല. മാനസികാരോഗ്യ വിദഗ്‌ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്‌ലൈൻ നമ്പരുകൾ - 1056, 0471- 2552056).