യമൻ: ശനിയാഴ്ച പുലർച്ചെ ടെൽ അവീവിന് സമീപമുള്ള ബെൻ ഗുരിയോൺ വിമാനത്താവളത്തിന് നേരെ ബാലിസ്റ്റിക് മിസൈൽ തൊടുത്തുവിട്ടതായി ഹൂതി സൈനിക വക്താവ് യഹ്‌യ സാരി വ്യക്തമാക്കി. കഴിഞ്ഞ 48 മണിക്കൂറിനുള്ളിൽ ഇസ്റാഈലിനെതിരെ ഹൂതികൾ നടത്തുന്ന മൂന്നാമത്തെ ആക്രമണമാണിത്. ആക്രമണത്തിന്റെ ഉത്തരവാദിത്തം ഇറാനുമായി സഖ്യത്തിലുള്ള യമനിലെ ഹൂതി ഗ്രൂപ്പ് ഏറ്റെടുത്തു. കൂടാതെ, ചെങ്കടലിൽ യുഎസ് വിമാനവാഹിനിക്കപ്പലായ യുഎസ്എസ് ഹാരി എസ്. ട്രൂമാനെതിരെ ആക്രമണം നടത്തിയതായും സാരി അവകാശപ്പെട്ടു.

തൊടുത്തുവിട്ട രണ്ട് മിസൈലുകൾ വെടിവച്ചിട്ട് ഒരു ദിവസത്തിന് ശേഷം, വെള്ളിയാഴ്ച യമനിൽ നിന്ന് വിക്ഷേപിച്ച മറ്റൊരു മിസൈൽ തടഞ്ഞതായി ഇസ്റാഈൽ സൈന്യവും അറിയിച്ചു. 

ബെൻ ഗുരിയോൺ വിമാനത്താവളം "ഇനി വിമാന യാത്രയ്ക്ക് സുരക്ഷിതമല്ല" എന്നും, ഗസ്സയ്‌ക്കെതിരായ ഇസ്റാഈലിന്റെ ആക്രമണം അവസാനിപ്പിക്കുകയും ഉപരോധം നീക്കുകയും ചെയ്യുന്നതുവരെ അത് അങ്ങനെ തുടരുമെന്നും വക്താവ് വിമാനക്കമ്പനികൾക്ക് മുന്നറിയിപ്പ് നൽകി. എന്നിരുന്നാലും, വിമാനത്താവളത്തിന്റെ വെബ്‌സൈറ്റ് സാധാരണ രീതിയിൽ പ്രവർത്തിക്കുന്നതായും ഷെഡ്യൂൾ ചെയ്ത വിമാനങ്ങളുടെ വിവരങ്ങൾ പ്രദർശിപ്പിക്കുന്നതായും ഉദ്യോ​ഗസ്ഥർ വ്യക്തമാക്കി. 

അമേരിക്കയുടെ സമീപകാല ആക്രമണങ്ങൾക്ക് പ്രതികാരമായി ഇസ്റാഈലിനെ ലക്ഷ്യമിട്ടുള്ള സൈനിക നടപടികൾ ശക്തമാക്കുമെന്ന് ഹൂതികൾ പ്രതിജ്ഞയെടുത്തിരുന്നു. 2023 അവസാനം ഇസ്റഈൽ-ഹമാസ് യുദ്ധം ആരംഭിച്ചതിന് ശേഷം, ​ഗസ്സയിലെ പലസ്തീനികളോട് ഐക്യദാർഢ്യം പ്രകടിപ്പിക്കുന്നതിന്റെ ഭാഗമായി ഹൂതികൾ 100-ലധികം വാണിജ്യ കപ്പലുകൾക്ക് നേരെ ആക്രമണം നടത്തിയിട്ടുണ്ട്. ആക്രമണങ്ങൾ ആഗോള വ്യാപാരത്തെ തടസ്സപ്പെടുത്തുകയും യുഎസ് സൈന്യത്തെ ചെലവേറിയ പ്രതിരോധ ശ്രമങ്ങൾക്ക് പ്രേരിപ്പിക്കുകയും ചെയ്തു. ജനുവരിയിൽ പ്രസിഡന്റ് ഡൊണാൾഡ് ട്രംപ് അധികാരമേറ്റ ശേഷം, ഈ മാസം ആദ്യം മിഡിൽ ഈസ്റ്റിൽ യുഎസ് നടത്തിയ വിപുലമായ സൈനിക നടപടിയിൽ കുറഞ്ഞത് 50 പേർ കൊല്ലപ്പെട്ടു.

ഹൂതികൾ "ആക്സിസ് ഓഫ് റെസിസ്റ്റൻസ്" എന്നറിയപ്പെടുന്ന സഖ്യത്തിന്റെ ഭാഗമാണ്. ഇത് ഇസ്റാഈൽ വിരുദ്ധവും പാശ്ചാത്യ വിരുദ്ധവുമായ പ്രാദേശിക സായുധ സംഘങ്ങളുടെ കൂട്ടായ്മയാണ്, ഇതിൽ ഹമാസ്, ലെബനനിലെ ഹിസ്ബുള്ള, ഇറാഖിലെ സായുധ ഗ്രൂപ്പുകൾ എന്നിവ ഉൾപ്പെടുന്നു. ഇവയ്ക്കെല്ലാം ഇറാന്റെ പിന്തുണയുണ്ട്. യമനിൽ അമേരിക്ക ആക്രമണം തുടരുന്നിടത്തോളം ചെങ്കടലിൽ യുഎസ് കപ്പലുകളെ ലക്ഷ്യമിടുമെന്ന് ഹൂതി നേതാവ് പ്രഖ്യാപിച്ചിരുന്നു. കഴിഞ്ഞ ആഴ്ച, ഗസ്സയിലേക്കുള്ള സഹായങ്ങൾക്ക് ഇസ്റഈൽ തടസ്സം നീക്കിയില്ലെങ്കിൽ ചെങ്കടലിലൂടെ കടന്നുപോകുന്ന ഇസ്റഈലി കപ്പലുകൾക്ക് നേരെ ആക്രമണം പുനരാരംഭിക്കുമെന്നും ഹൂതികൾ മുന്നറിയിപ്പ് നൽകി.