കൊൽക്കത്ത: 2025 ഐപിഎല്ലിലെ ആദ്യ മത്സരത്തിൽ റോയൽ ചലഞ്ചേഴ്‌സ് ബാംഗ്ലൂരിന് വിജയത്തുടക്കം. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സിനെ ഏഴ് വിക്കറ്റുകൾക്കാണ് ആർസിബി പരാജയപ്പെടുത്തിയത്. കൊൽക്കത്തയുടെ തട്ടകമായ ഈഡൻ ഗാർഡനിൽ നടന്ന മത്സരത്തിൽ ആദ്യം ബാറ്റ് ചെയ്ത കൊൽക്കത്ത 20 ഓവറിൽ എട്ടു വിക്കറ്റ് നഷ്ടത്തിൽ 174 നേടിയത് വിജയലക്ഷ്യം പിന്തുടർന്നിറങ്ങിയ ബാംഗ്ലൂർ മൂന്നു വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു. 

മത്സരത്തിൽ ബാംഗ്ലൂരിന് വേണ്ടി തുടക്കം മുതലേ തകർത്തടിച്ച ഓപ്പണർമാരായ ഫിൽ സാൾട്ടും വിരാട് കോഹ്‌ലിയുമാണ്‌ ആർസിബി അനയാസം വിജയത്തിലേക്ക് നയിച്ചത്. 31 പന്തിൽ 56 റൺസ് ആണ് സാൾട്ട് അടിച്ചെടുത്തത്. ഒമ്പത് ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിങ്സ്. കോഹ്‌ലി 36 പന്തിൽ പുറത്താവാതെ 59 റൺസും നേടി തിളങ്ങി. നാല് ഫോറുകളും മൂന്ന് സിക്സുമാണ് കോഹ്‌ലി നേടിയത്. ക്യാപ്റ്റൻ രജത് പടിതാർ 16 പന്തിൽ 34 റൺസും നേടി വിജയത്തിൽ നിർണായകമായി. അഞ്ചു ഫോറുകളും ഒരു സിക്സുമാണ് താരം നേടിയത്. 

ആദ്യം ബാറ്റ് ചെയ്ത കൊൽക്കത്തയ്ക്കായി ക്യാപ്റ്റൻ അജിങ്ക്യ രഹാനെ അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. ആറ് ഫോറുകളും നാല് സിക്സുകളും ഉൾപ്പെടെ 31 പന്തിൽ 56 റൺസ് ആണ് രഹാനെ നേടിയത്. സുനിൽ നരെയ്ൻ 26 പന്തിൽ 44 റൺസും നേടി. അഞ്ച് ഫോറുകളും മൂന്ന് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. അൻക്രിഷ് രഖുവംശി 22 പന്തിൽ 30 റൺസും നേടി നിർണായകമായി. 

ആർസിബിയുടെ ബൗളിങ്ങിൽ കൃണാൽ പാണ്ഡ്യ മൂന്നു വിക്കറ്റുകളും ജോഷ് ഹേസൽവുഡ് രണ്ട് വിക്കറ്റുകളും നേടി തിളങ്ങി. യാഷ് ദയാൽ, റാഷിഖ് സലാം, സായുഷ് ശർമ്മ എന്നിവർ ഓരോ വീതം വിക്കറ്റുകളും നേടി.

മാർച്ച് 28ന് ചെന്നൈ സൂപ്പർ കിങ്സിനെതിരെയാണ് ബാംഗ്ലൂരിന്റെ അടുത്ത മത്സരം. ചെന്നൈയുടെ തട്ടകമായ  എംഎ ഈമ്പരം സ്റ്റേഡിയത്തിലാണ് മത്സരം നടക്കുക. മറുഭാഗത്ത് മാർച്ച് 26ന് നടക്കുന്ന മത്സരത്തിൽ രാജസ്ഥാൻ റോയൽസ് ആണ് കൊൽക്കത്തയുടെ എതിരാളികൾ. ആസാമിലെ ഗുഹത്തി സ്റ്റേഡിയത്തിലാണ് മത്സരം നടക്കുന്നത്.

Royal Challengers Bangalore beat Kolkata Knight Riders in the opening match of ipl