തിരുവനന്തപുരം: ഓപ്പറേഷൻ ഡീ ഹണ്ടിന്റെ ഭാഗമായി ഇന്നലെ തിരുവനന്തപുരത്ത് നടത്തിയ വ്യാപകമായ സ്പെഷ്യൽ ഡ്രൈവിൽ 227 എംഡിഎംഎ കേസുകൾ രജിസ്റ്റർ ചെയ്തു. കേസിൽ മയക്കുമരുന്ന് കൈവശം വെച്ചതിന് 232 ആളുകളാണ് അറസ്റ്റിൽ ആയത്. 0.0253 കിലോഗ്രാം എംഡിഎംഎ, 7.315 കിലോഗ്രാം കഞ്ചാവ് എന്നിവയാണ് പരിശോധനയിൽ പിടികൂടിയത്.

ഇതിനുപുറമേ 159 കഞ്ചാവ് ബീഡികളും പൊലിസ് പിടിച്ചെടുത്തു. വ്യത്യസ്ത തരത്തിലുള്ള നിരോധിക്കപ്പെട്ട മയക്കുമരുന്ന് വിൽപ്പന നടത്തുന്നുവെന്ന് സംശയിക്കപ്പെടുന്ന 2703 പേരെയാണ് പൊലിസ് പരിശോധനയ്ക്ക് വിധേയമാക്കിയത്. 

നിരോധിക്കപ്പെട്ട മയക്കുമരുന്നുകളുടെ സംഭരണത്തിലും വിപണനത്തിലും ഏർപ്പെടുന്ന ആളുകളെ കണ്ടുപിടിച്ച് നിയമ നടപടികൾ സ്വീകരിക്കുന്നതിനു വേണ്ടിയാണ് സംസ്ഥാനത്ത് വ്യാപകമായി ഓപ്പറേഷൻ ഡി ഹണ്ട് നടത്തുന്നത്.

പൊതുജനങ്ങളിൽ നിന്നും മയക്കുമരുന്ന് സംബന്ധിച്ചുള്ള വിവരങ്ങൾ സ്വീകരിച്ചു നടപടികൾ കൈക്കൊള്ളുന്നതിന് വേണ്ടി 24 മണിക്കൂറും പ്രവർത്തിക്കുന്ന ആന്റി നർക്കോട്ടിക്  കൺട്രോൾ റൂം പ്രവർത്തിക്കുന്നുണ്ട്. 9497927797 എന്ന നമ്പറിലാണ് ബന്ധപ്പെടേണ്ടത്. ഈ നമ്പറിൽ വിളിക്കുന്നവരുടെ വിവരങ്ങൾ രഹസ്യമായി സൂക്ഷിക്കും.

MDMA and cannabis seized during a search conducted as part of Operation D Hunt