തിരുവനന്തപുരം: സഭയില്‍ സ്പീക്കറും കെ.ടി ജലില്‍ എം.എല്‍.എയും തമ്മില്‍ വാക്‌പോര്. ആവശ്യപ്പെട്ടിട്ടും പ്രസംഗം അവസാനിപ്പിക്കാത്തതിന് പിന്നാലെ സ്പീക്കര്‍ എ.എന്‍. ഷംസീര്‍ കെ.ടി. ജലീലിനോട് ക്ഷുഭിതനായി പ്രതികരിച്ചു. ഇതിന് രൂക്ഷമായ രീതിയില്‍ ജലീല്‍ മറുപടിയും നല്‍കി. 

തിങ്കളാഴ്ച സ്വകാര്യ സര്‍വകലാശാല ബില്‍ പരിഗണിക്കുന്നതിനിടെയായിരുന്നു ഈ സംഭവവികാസങ്ങള്‍. കെ.ടി ജലീലന്റെ പ്രസംഗം പത്ത് മിനിറ്റ് പിന്നിട്ടതോടെ, അവസാനിപ്പിക്കാന്‍ പല തവണ സ്പീക്കര്‍ ആവശ്യപ്പെടുകയായിരുന്നു. 17 മിനിറ്റായിട്ടും പ്രസംഗം തുടര്‍ന്നു. പിന്നാലെ സ്പീക്കര്‍ മുന്നറിയിപ്പ് നല്‍കി. ബില്ലില്‍ വിയോജനക്കുറിപ്പ് നല്‍കിയ പ്രതിപക്ഷത്തെ മൂന്ന് അംഗങ്ങളും പ്രസംഗം പത്ത് മിനിറ്റില്‍ അവസാനിപ്പിച്ച് സഹകരിച്ചതായി ചൂണ്ടിക്കാട്ടിയ ചെയര്‍ ജലീല്‍ പ്രസംഗം നിര്‍ത്താതെ വന്നതോടെ മൈക്ക് ഓഫ് ചെയ്തു.

തുടര്‍ന്ന് സംസാരിക്കേണ്ട ഇ.കെ. വിജയനെ ക്ഷണിക്കുകയും ചെയ്തു. എന്നാല്‍ ഇത് വകവെക്കാതെ ജലീല്‍ മൈക്കില്ലാതെ പ്രസംഗം തുടര്‍ന്നു. ഇക്കാര്യത്തില്‍ സ്പീക്കര്‍ രൂക്ഷ വിമര്‍ശനം നടത്തി.

ചെയറിനോട് കാണിക്കേണ്ട മര്യാദ ജലീല്‍ കാണിച്ചില്ലെന്ന് സ്പീക്കര്‍ തുറന്നടിച്ചു. ജലീല്‍ കാണിച്ചത് ധിക്കാരമാണെന്നും സ്പീക്കര്‍ കൂട്ടിച്ചേര്‍ത്തു. ഒരുപാട് തവണ പറഞ്ഞിട്ടും ചെയറിനെ ധിക്കരിക്കുകയായിരുന്നുവെന്ന് ചൂണ്ടിക്കാട്ടിയ സ്പീക്കര്‍ ജലീലിന് സഭയില്‍ പ്രത്യേക പ്രിവിലേജില്ലെന്നും തിരിച്ചടിച്ചു. 

ചെയര്‍ കാണിച്ചത് ശരിയല്ലെന്നായിരുന്നു ജലീലിന്റെ മറുപടി.

A heated exchange unfolded in the Kerala Assembly when Speaker AN Shamseer reprimanded MLA KT Jaleel for refusing to end his speech despite multiple requests.