ജാംനഗര്‍: ഗുജറാത്തിലെ സുവര്‍ദ ഗ്രാമത്തില്‍ രണ്ട് പൈലറ്റുമാരുമായി പറന്ന ഇന്ത്യന്‍ വ്യോമസേനയുടെ യുദ്ധവിമാനം തകര്‍ന്നുവീണു. വിമാനം നിലത്ത് തകര്‍ന്നു വീഴുമ്പോള്‍ വന്‍തോതില്‍ തീപിടുത്തമുണ്ടാകുന്നതും ഗുരുതരമായി പരുക്കേറ്റ ഒരു പൈലറ്റിനെയും ദൃശ്യങ്ങളില്‍ കാണാം.

പരുക്കേറ്റ പൈലറ്റുമാരെ സഹായിക്കാന്‍ നാട്ടുകാര്‍ ഓടിക്കൂടി. സാങ്കേതിക തകരാറുകള്‍ മൂലമാണ് യുദ്ധവിമാനം തകര്‍ന്നതെന്നാണ് പ്രാഥമിക സൂചന.

'ഇന്ത്യന്‍ വ്യോമസേനയുടെ ജാഗ്വാര്‍ യുദ്ധവിമാനം ജാംനഗറില്‍ തകര്‍ന്നുവീണു. ഒരു പൈലറ്റ് സുരക്ഷിതമായി പുറത്തേക്ക് ചാടി. മറ്റൊരാള്‍ക്കായി തിരച്ചില്‍ തുടരുന്നു.' സംഭവത്തെക്കുറിച്ച് ജാംനഗര്‍ എസ്പി പ്രേംസുഖ് ദേലു പറഞ്ഞു. 

അഗ്‌നിശമന സേനാംഗങ്ങള്‍ ഉള്‍പ്പെടെയുള്ള അടിയന്തര സംഘം അപകടസ്ഥലത്ത് തീ നിയന്ത്രണവിധേയമാക്കാനും കാണാതായ പൈലറ്റിനെ കണ്ടെത്താനുമുള്ള ശ്രമം തുടരുകയാണ്. അപകടകാരണത്തെക്കുറിച്ച് കൂടുതല്‍ അന്വേഷണം നടന്നുവരികയാണ്.

കഴിഞ്ഞ മാസം ഹരിയാനയിലെ അംബാല ജില്ലയില്‍ പരിശീലന പറക്കലിനു ശേഷം ഒരു ജാഗ്വാര്‍ വിമാനം തകര്‍ന്നുവീണിരുന്നു.

An Air Force Jaguar fighter jet crashed in Jamnagar, Gujarat.