ന്യൂഡല്‍ഹി: അവിഹിത ബന്ധമുണ്ടെന്ന സംശയത്തെ തുടര്‍ന്ന് ഭര്‍ത്താവ് ഭാര്യയെ ചുറ്റിക കൊണ്ട് തലയ്ക്കടിച്ചു കൊന്നു. നോയിഡയിലാണ് ഭര്‍ത്താവായ നൂറുള്ള ഹൈദറാണ് (55) ഭാര്യയായ അസ്മാ ഖാനെ ചുറ്റിക കൊണ്ട് തലയ്ക്കടിച്ചു കൊന്നത്. ബീഹാര്‍ സ്വദേശിയായ നൂറുള്ള ഹൈദറിനെ പൊലിസ് പിടികൂടിയിട്ടുണ്ട്.

ജാമിയ മില്ലിയ ഇസ്‌ലാമിയയില്‍ നിന്നും സിവില്‍ എഞ്ചിനീയറിംഗ് ബിരുദം നേടിയ ശേഷം സെക്ടര്‍ 62 ലെ ഒരു സ്വകാര്യ സ്ഥാപനത്തില്‍ ജോലി ചെയ്യുകയായിരുന്നു അസ്മാ ഖാന്‍. എഞ്ചിനീയര്‍ ബിരുദധാരിയായ നൂറുള്ള തൊഴില്‍രഹിതനായിരുന്നു. ഭാര്യക്ക് ജോലി ലഭിച്ചതില്‍ ഇയാള്‍ക്ക് അസ്വസ്ഥതയുള്ളതായി പൊലിസ് പറഞ്ഞു.

2005 ല്‍ വിവാഹിതരായ ഇവര്‍ക്ക് രണ്ട് കുട്ടികളുണ്ട്. ആദ്യത്തെയാള്‍ എഞ്ചിനീയറിംഗിനും മറ്റേയാള്‍ എട്ടാം ക്ലാസിലാണ് പഠിക്കുന്നത്. സെക്ടര്‍ 15 ലെ രണ്ടു നില വീടിന്റെ മുകളിലത്തെ നിലയിലായിരുന്നു കുടുംബം താമസിച്ചിരുന്നത്. താഴത്തെ നില അതിഥികള്‍ക്ക് വാടകയ്ക്ക് നല്‍കിയിരിക്കുകയാണ്. മരണസമയത്ത് അസ്മയുടെ മാതാവും രണ്ട് കുട്ടികളും കുടുംബ വീട്ടിലായിരുന്നു താമസിച്ചിരുന്നത്.

ഭാര്യയ്ക്ക് മറ്റൊരാളുമായി ബന്ധമുണ്ടെന്ന് നൂറുള്ള വര്‍ഷങ്ങളോളം വിശ്വസിച്ചിരുന്നതായി പൊലിസ് പറഞ്ഞു. ഇക്കാരണത്താല്‍ ഇവര്‍ തമ്മില്‍ പലപ്പോഴും തര്‍ക്കങ്ങളുണ്ടായിരുന്നു. വെള്ളിയാഴ്ച ദമ്പതികള്‍ തമ്മിലുള്ള തര്‍ക്കം രൂക്ഷമായതിനെ തുടര്‍ന്ന് നൂറുള്ള ചുറ്റിക ഉപയോഗിച്ച് അസ്മയെ തലയ്ക്കടിച്ച് കൊലപ്പെടുത്തുകയായിരുന്നു.