മലപ്പുറം: വീട്ടിലെ പ്രസവത്തെ തുടര്‍ന്ന് യുവതി മരിച്ച സംഭവത്തില്‍ ഭര്‍ത്താവ് സിറാജുദ്ദീനെതിരെ നരഹത്യാക്കുറ്റം ചുമത്തി. തെളിവുനശിപ്പിക്കല്‍ കുറ്റവും ഇയാള്‍ക്കെതിരെ ചുമത്തിയിട്ടുണ്ട്. ചട്ടിപ്പറമ്പില്‍ കഴിഞ്ഞ ദിവസം മരണപ്പെട്ട പെരുമ്പാവൂര്‍ സ്വദേശി അസ്മയുടെ മരണത്തില്‍ കഴിഞ്ഞ ദിവസമാണ് ഭര്‍ത്താവ് ആലപ്പുഴ സ്വദേശി സിറാജുദ്ദീനെ പൊലിസ് കസ്റ്റഡിയിലെടുത്തത്. ഇയാളുടെ അറസ്റ്റ് രേഖപ്പെടുത്തിയതായി മലപ്പുറം എസ്.പി ആര്‍. വിശ്വനാഥ് പറഞ്ഞു. 

ഇവര്‍ വാടകയ്ക്ക് താമസിക്കുന്ന വീട്ടില്‍ വെച്ചാണ് ശനിയാഴ്ച വൈകീട്ട് പ്രസവത്തെ തുടര്‍ന്നാണ് യുവതി മരിച്ചത്. മൃതദേഹം സ്വദേശത്തേയ്ക്ക് കൊണ്ടുപോവുകയും പൊലിസ് ഇടപെട്ട് ആശുപത്രിയിലേക്ക് മാറ്റുകയുമായിരുന്നു. പോസ്റ്റ്മോര്‍ട്ടത്തിന് ശേഷം ഖബറടക്കി. 

കുടുംബത്തിന്റെ പരാതിയെ തുടര്‍ന്നാണ് ഭര്‍ത്താവ് സിറാജുദ്ദീനെ പൊലിസ് കസ്റ്റഡിയിലെടുത്ത്. ആലപ്പുഴ പൊലിസ് കേസെടുത്ത ശേഷം ഇദ്ദേഹത്തെ മലപ്പുറം പൊലിസിന് കൈമാറി. ഇദ്ദേഹത്തെ പൊലിസ് ചോദ്യം ചെയ്തുവരികയാണ്.