ന്യൂഡല്‍ഹി: തന്റെ ആദ്യ ഔദ്യോഗിക സന്ദര്‍ശനത്തിനെത്തിയ യു.എ.ഇ ഉപപ്രധാനമന്ത്രിയും പ്രതിരോധമന്ത്രിയും ദുബൈ കിരീടാവകാശിയുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമിന് ഇന്ത്യയൊരുക്കിയത് ഊഷ്മള സ്വീകരണം. പ്രത്യേകവിമാനത്തില്‍ ഡല്‍ഹിയിലെത്തിയ ഷെയ്ഖ് ഹംദാനെ, കേന്ദ്ര ടൂറിസം, പെട്രോളിയം സഹമന്ത്രി സുരേഷ് ഗോപിയാണ് സ്വീകരിച്ചത്. പ്രധാനമന്ത്രി നരേന്ദ്രമോദി, വിദേശകാര്യമന്ത്രി എസ്. ജയ്ശങ്കര്‍, പ്രതിരോധമന്ത്രി രാജ്‌നാഥ് സിങ് എന്നിവരുള്‍പ്പെടെയുള്ളവരുമായി ഹംദാന്‍ കൂടിക്കാഴ്ച നടത്തി. ഹംദാനുവേണ്ടി പ്രധാനമന്ത്രി പ്രത്യേക വിരുന്നും ഒരുക്കി. സുപ്രധാന മേഖലകളിലെ ഉഭയകക്ഷി സഹകരണം ശക്തിപ്പെടുത്തുന്നതിനുള്ള മാര്‍ഗങ്ങളെക്കുറിച്ച് ഇരുരാഷ്ട്രനേതാക്കളും ചര്‍ച്ചചെയ്തതായി വിദേശകാര്യമന്ത്രാലയം അറിയിച്ചു. 

തന്റെ പൂര്‍വികര്‍ തുടക്കമിട്ട ബന്ധം ഉറപ്പിക്കുകയാണ് 42 കാരനായ ഷെയ്ഖ് ഹംദാന്റെ ദൗത്യം. പ്രധാനമന്ത്രി മോദിയുമായുള്ള കൂടിക്കാഴ്ചയില്‍ യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനും വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിനും ഇന്ത്യയുമായുള്ള അടുപ്പത്തെക്കുറിച്ച് ഹംദാന്‍ വിവരിക്കുകയുംചെയ്തു. ദ്വിദിന സന്ദര്‍ശനം പൂര്‍ത്തിയാക്കി അദ്ദേഹം ഇന്ന് മടങ്ങും. കിരീടാവകാശിയായ ശേഷമുള്ള ഹംദാന്റെ ആദ്യ ഇന്ത്യന്‍ സന്ദര്‍ശനമാണിത്.

സ്വീകരിക്കുന്നതിലെ മലയാളി തനിമ

ഇന്ത്യക്ക് പുറത്ത് ഇന്ത്യക്കാര്‍ ഏറ്റവും കൂടുതലുള്ള രാജ്യമായ യുഎഇയുടെ ഉന്നതരാഷ്ട്രനേതാവിനെ ഇന്ത്യ അര്‍ഹിക്കുന്ന ആദവരവോടെ തന്നെയാണ് വരവേറ്റത്. ഡല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തില്‍ അദ്ദേഹം ഇറങ്ങുമ്പോള്‍ ഒരുക്കിയ സ്വീകരണത്തില്‍ കേരളത്തിന്റെ പരമ്പരാഗത ചെണ്ട മേളവും ഇന്ത്യ ഒരുക്കിയിരുന്നു. ഇതിന്റെ ചിത്രം സമൂഹമാധ്യമ പേജില്‍ ഷെയ്ഖ് ഹംദാന്‍ പങ്കുവയ്ക്കുകയുംചെയ്തു. യുഎഇ വിമാനത്തിന്റെ പശ്ചാത്തലത്തില്‍ മേളക്കാര്‍ ചെണ്ടകൊട്ടുന്നതാണ് ചിത്രം.
യുഎഇയിലെ നാലുദശലക്ഷത്തിനടുത്തുള്ള പ്രവാസി ഇന്ത്യക്കാരില്‍ നല്ലൊരുവിഭാഗവും മലയാളികളാണ്. ട്വിറ്ററില്‍ ദശലക്ഷക്കണക്കിന് ഫോളേവേഴ്‌സുള്ള ഷെയ്ഖ് ഹംദാന്‍, സോഷ്യല്‍മീഡിയയില്‍ ഏറ്റവുമധികം സജീവമായ യുഎഇയിലെ രാഷ്ട്രനേതാവാണ്.

 

 

സാമ്പത്തിക ബന്ധം വിപുലപ്പെടുത്തും

ഇന്ത്യയുടെ ഏറ്റവും വിശ്വസ്ത പങ്കാളികളിലൊന്നാണ് യുഎഇ. ഇന്ത്യയിലേക്ക് കൂടുതല്‍ വിദേശനാണ്യം എത്തിക്കുന്ന രാജ്യങ്ങളിലൊന്നും യുഎഇയാണ്. അതിനാല്‍ ദുബൈ കിരീടാവകാശിയുമായുള്ള ഇന്ത്യന്‍ സര്‍ക്കാരിന്റെ ചര്‍ച്ചകളില്‍ പ്രധാനമായും വിഷയമായതും വ്യാപാര, സാമ്പത്തിക ബന്ധം വിപുലപ്പെടുത്തലാണ്. ബന്ധം കൂടുതല്‍ ആഴത്തിലാക്കാനുള്ള യുഎഇയുടെ പ്രതിബദ്ധത കൂടിക്കാഴ്ചയില്‍ ഷെയ്ഖ് ഹംദാന്‍ അടിവരയിട്ടു. ഹംദാന്റെ സന്ദര്‍ശനത്തിനൊപ്പം തന്നെ, ദുബൈയിയുടെ വ്യവസായ അന്തരീക്ഷം ഇന്ത്യന്‍ സംരംഭകരെ ആകര്‍ഷിക്കുന്നത് എങ്ങനെയാണെന്നും അത് ദക്ഷിണേഷ്യയിലെ പ്രധാന വാണിജ്യകേന്ദ്രമാക്കി മാറിയത് എങ്ങിനെയാണെന്നും പറയുന്ന വിശദാംശങ്ങള്‍ ദുബൈ മീഡിയ ഓഫിസ് പുറത്തുവിടുകയുംചെയ്തു.

 

 

കഴിഞ്ഞ അഞ്ച് വര്‍ഷത്തിനിടെ ദുബൈയിലെ ഇന്ത്യന്‍ പ്രവാസികളുടെ നിക്ഷേപങ്ങള്‍ കുതിച്ചുയര്‍ന്ന് 15 ബില്യന്‍ ദിര്‍ഹമിലെത്തി. ഒപ്പം ദുബൈയിയുടെ ഇന്ത്യയിലെ നിക്ഷേപങ്ങള്‍ 17.2 ബില്യന്‍ ദിര്‍ഹമും ആയി. 70,000ത്തിലേറെ ഇന്ത്യന്‍ ബിസിനസ് സ്ഥാപനങ്ങളാണ് നിലവില്‍ ദുബൈയില്‍ പ്രവര്‍ത്തിക്കുന്നത്.
ഡല്‍ഹിയില്‍നിന്ന് നേരെ മുംബൈയിലെത്തിയ ഹംദാന്‍  ഇന്ത്യന്‍ ബിസിനസ് പ്രമുഖരുമായും ചര്‍ച്ചനടത്തി. കേന്ദ്ര വാണിജ്യസ വ്യവസായ മന്ത്രി പീയൂഷ് ഗോയലിന്റെ സാന്നിധ്യത്തിലായിരുന്നു ചര്‍ച്ചകള്‍. 

Dubai Crown Prince presents PM Modi replica of his grandfather’s traditional cloak