കണ്ണൂര്‍: അമ്മയെയും വിദ്യാര്‍ഥികളായ രണ്ടു മക്കളെയും വീട്ടുവളപ്പിലെ കിണറില്‍ മരിച്ചനിലയില്‍ കണ്ടെത്തി. കണ്ണൂര്‍ മീന്‍കുന്ന് മമ്പറം പീടികയ്ക്കു സമീപം മഠത്തില്‍ ഹൗസില്‍ ഭാമ(45), ശിവനന്ദ്(14), അശ്വന്ത്(11) എന്നിവരാണു മരിച്ചത്. വീട്ടില്‍ ഇവരെ കൂടാതെ ഭാമയുടെ അമ്മയും സഹോദരിയുമാണുള്ളത്. ഭര്‍ത്താവ് രമേഷ് ബാബു അമ്മ തനിച്ചു താമസിക്കുന്നതിനാല്‍ അഴീക്കല്‍ ചാലിലെ വീട്ടിലായിരുന്നു. ഭാമയ്ക്ക് മാനസികാസ്വാസ്ഥ്യമുണ്ടായിരുന്നുവെന്ന് കുടുംബം പറയുന്നു.

വീട്ടുകാരുടെ നിരീക്ഷണത്തിലായിരുന്നു ഇവര്‍. പുലര്‍ച്ചെ രണ്ടരയ്ക്കു ശബ്ദം കേട്ടാണ് ഭാമയുടെ സഹോദരി ഉണരുന്നത്. അവര്‍ മുറിയില്‍ ചെന്നു നോക്കുമ്പോള്‍ ഭാമയെയും കുട്ടികളെയും കാണുന്നില്ലായിരുന്നു. എല്ലായിടത്തും തിരയുകയും അയല്‍വാസികളെ വിളിച്ചു വരുത്തി തിരഞ്ഞിട്ടും ഇവരെ കണ്ടെത്താന്‍ കഴിഞ്ഞില്ല.

കിണറ്റില്‍ നോക്കിയെങ്കിലും ഒരുസൂചനയും ലഭിച്ചില്ല. കിണറിന്റെ വല മാറ്റുകയോ കിണറിനടുത്ത് ചെരിപ്പോ ഒന്നുമില്ലായിരുന്നു. വളപട്ടണം പൊലിസ് സ്ഥലത്തെത്തി നടത്തിയ തിരച്ചിലില്‍ പുലര്‍ച്ചെ നാലുമണിയോടുകൂടിയാണ് മൃതദേഹം കണ്ടെത്തിയത്. അഗ്നിരക്ഷാസേന എത്തിയാണ് മൃതദേഹങ്ങള്‍ കിണറ്റില്‍ നിന്നുമെടുത്തത്. 

ഉറങ്ങിക്കിടന്ന മക്കളെ എങ്ങനെ കിണറ്റിനരികിലേക്കത്തിച്ചുവെന്നതാണ് ഉയരുന്ന ചോദ്യം. മാനസികാസ്വാസ്ഥ്യത്തിനു മരുന്നു കഴിക്കുന്ന ഭാമ അടുത്തിടെ ആത്മഹത്യക്കും ശ്രമിച്ചിരുന്നുവെന്നു കുടുംബം പറയുന്നു. ശിവനന്ദും അശ്വന്തും അഴീക്കോട് ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികളാണ്. പൊലിസ് ഇന്‍ക്വസ്റ്റ് നടത്തി. ഭര്‍ത്താവ് അഴീക്കലില്‍ മത്സ്യത്തൊഴിലാളിയാണ്. മൃതദേഹം പോസ്റ്റുമോര്‍ട്ടത്തിനു ശേഷം മീന്‍കുന്ന് കുഴക്കീല്‍ ശ്മശാനത്തില്‍ സംസ്‌കരിച്ചു.