മലപ്പുറം: നിലമ്പൂർ ഉപതെരഞ്ഞെടുപ്പിന് മുൻപായി തന്നെ യുഡിഎഫിലേക്ക് പ്രവേശനം വേണമെന്ന് മുന്നറിയിപ്പുമായി രം​ഗത്തു വന്നിരിക്കുകയാണ് മുൻ എംഎൽഎ പി.വി. അൻവർ. "ഉപതെരഞ്ഞെടുപ്പിന് മുൻപ് യുഡിഎഫ് പ്രവേശനം ഉറപ്പായില്ലെങ്കിൽ പിന്നീട് എന്തെല്ലാമാണ് സംഭവിക്കേണ്ടി വരികയെന്നത് ചിന്തിക്കേണ്ടിവരും," എന്നും അൻവർ പറഞ്ഞു.

 യുഡിഎഫ് നേതാക്കളെ വിജയ സാധ്യതയുള്ള സ്ഥാനാർത്ഥിയെക്കുറിച്ച് അറിയിച്ചിട്ടുണ്ടെന്നും, പിണറായിക്കെതിരായ ശക്തമായ പോരാട്ടത്തിനായി മുന്നണിയിൽ ചേരേണ്ടതിന്റെ ആവശ്യകതയും പി.വി. അൻവർ ആവർത്തിച്ചു.

"പിണറായിസത്തെ തകർക്കാനുള്ള യോജിച്ച പോരാട്ടത്തിന് താൻ എംഎൽഎ സ്ഥാനത്ത് നിന്നും രാജിവെച്ചു. അതിന് പിന്നാലെ യുഡിഎഫ് ശക്തമായ നിലപാട് സ്വീകരിക്കണം. യുഡിഎഫ് പ്രവേശനം ഉറപ്പായാൽ കൂടുതൽ ആളുകൾ തനിക്കൊപ്പം വരും.  അത്തരത്തിൽ  കൂട്ടായ പ്രവര്‍ത്തനം നടത്താനാകും. തെരഞ്ഞെടുപ്പിന് മുമ്പ് യുഡിഎഫ് പ്രവേശനം വേണം.

2026ൽ മത്സരിക്കില്ലെന്ന് പറഞ്ഞിട്ടില്ലെന്നും, നിലമ്പൂരിലെ ഉപതെരഞ്ഞെടുപ്പിൽ മാത്രമാണ് താൻ മത്സരിക്കാൻ താത്പര്യമില്ല എന്ന് പറഞ്ഞത് എന്നും അദ്ദേഹം വ്യക്തമാക്കി. നിലമ്പൂരിൽ നടക്കാനിരിക്കുന്ന പോരാട്ടം കേരളത്തിലെ ഏറ്റവും നിർണായകമാകുമെന്നും അൻവർ വിശ്വസിക്കുന്നു.

ഉപതെരഞ്ഞെടുപ്പിൽ ആരാണ് കോൺഗ്രസ് സ്ഥാനാർത്ഥിയാകുക എന്നതിൽ ഇപ്പോഴും അനിശ്ചിതത്വം നിലനിൽക്കുകയാണ്. വി.എസ്. ജോയിയോ, ആര്യാടൻ ഷൗക്കത്തോ സ്ഥാനാർത്ഥിയാകുമോ എന്നതിലാണ് ചര്‍ച്ചകള്‍. ഇന്ന് മുസ്ലിംലീഗ് കൺവെൻഷൻ നടക്കുന്നുണ്ട്.

എൽഡിഎഫ്  സ്വതന്ത്ര സ്ഥാനാർത്ഥിയെ പരിഗണിക്കുന്നതായാണ് സൂചന. ചുങ്കത്തറ മാർത്തോമ കോളേജിന്റെ മുൻ പ്രിൻസിപ്പാൾ പ്രൊ. തോമസ് മാത്യു, നിലമ്പൂർ താലൂക്ക് ആശുപത്രി സൂപ്രണ്ട് ഡോ. ഷിനാസ് ബാബു, മുൻ ഇന്ത്യൻ ഫുട്ബോൾ താരം യു. ഷറഫലി എന്നിവരെ പരിഗണിക്കുന്നതായി അറിയുന്നു. താൻ മത്സരത്തിന് തയ്യാറാണ് എന്ന നിലപാട് ഷറഫലി നേരത്തെ തന്നെ വ്യക്തമാക്കിയിരുന്നു.

നിലമ്പൂർ ഉപതെരഞ്ഞെടുപ്പിന്റെ ഔദ്യോഗിക പ്രഖ്യാപനം ഏതുസമയവും ഉണ്ടായേക്കും എന്നതോടെയാണ് മുന്നണികൾ സ്ഥാനാർത്ഥി നിർണ്ണയത്തിന്റെ തിരക്കിൽ ആയിരിക്കുന്നത്.

Former MLA PV Anwar has expressed his desire to join the UDF ahead of the Nilambur by-election. He stated that a collective political fight against the Pinarayi Vijayan government is possible only through UDF entry. Anwar added that he has already informed UDF leaders about the most winnable candidate and expects a decision soon. He also clarified that he will not contest in the by-election but emphasized that this is a crucial political battle. Meanwhile, Congress is yet to decide on its candidate, while the LDF is considering fielding a popular independent.