ദുബൈ: യുഎഇയിലെ ഏറ്റവും വലിയ സ്വകാര്യ പാര്‍ക്കിംഗ് ഓപ്പറേറ്ററായ പാര്‍ക്കോണിക്, ദുബൈയിലെ റോഡ് ടോള്‍ ഓപ്പറേറ്ററായ സാലിക്കുമായി ചേര്‍ന്ന് ഈ ആഴ്ച 18 പുതിയ സ്ഥലങ്ങള്‍ കൂടി പ്രവര്‍ത്തനക്ഷമമാക്കുമെന്ന് പ്രഖ്യാപിച്ചു. ഈ സൈറ്റുകള്‍ ഇനി നിങ്ങളുടെ സാലിക് അക്കൗണ്ട് വഴി ഈടാക്കുന്ന ഓട്ടോമാറ്റിക് പാര്‍ക്കിംഗ് പേയ്‌മെന്റ് സംവിധാനമാണ് ഇതിന്റെ പ്രത്യേകത.

സാലിക്കിന്റെ പേയ്‌മെന്റ് സംവിധാനത്തെ പാര്‍ക്കോണിക്കിന്റെ സ്മാര്‍ട്ട് പാര്‍ക്കിംഗ് സാങ്കേതികവിദ്യയുമായി സംയോജിപ്പിക്കുന്നത് വഴി കോണ്‍ടാക്റ്റ്‌ലെസ് പാര്‍ക്കിംഗ് അനുഭവം അവതരിപ്പിക്കാനാണ് ലക്ഷ്യംവെക്കുന്നത്. ഉപയോക്താക്കള്‍ക്ക് പാര്‍ക്കോണിക് ആപ്പ് വഴി പണമടയ്ക്കാം, ഓണ്‍-സൈറ്റ് ക്യുആര്‍ കോഡ് സ്‌കാന്‍ ചെയ്യാം. മുന്‍കൂര്‍ പണമടച്ചില്ലെങ്കില്‍ അവരുടെ സാലിക് അക്കൗണ്ടില്‍ നിന്ന് പാര്‍ക്കിംഗ് ഫീസ് സ്വയമേവ കുറയ്ക്കുന്ന ഓപ്ഷനുമുണ്ട്. 

'ഈ സംയോജനം നിലവിലുള്ള പാര്‍ക്കിംഗ് നിരക്കുകളെ ബാധിക്കില്ല, കൂടുതല്‍ കാര്യക്ഷമമായ ഉപയോക്തൃ അനുഭവത്തിനായി ഇത് പേയ്‌മെന്റ് പ്രക്രിയയെ ലളിതമാക്കും,' പാര്‍ക്കോണിക് അധികൃതര്‍ പറഞ്ഞു .

പുതിയ 18 സ്വകാര്യ പാര്‍ക്കിംഗ് സ്ഥലങ്ങള്‍

യൂണിയന്‍ കോപ് നാദ് അല്‍ ഹമര്‍
ഹീറ ബീച്ച്, ഷാര്‍ജ
പാര്‍ക്ക് ഐലന്റ്‌സ്‌
യൂണിയന്‍ കോപ്പ് അല്‍ ത്വാര്‍
യൂണിയന്‍ കോപ് സിലിക്കണ്‍ ഒയാസിസ്
യൂണിയന്‍ കോപ്പ് അല്‍ ഖൂസ്
യൂണിയന്‍ കോപ് അല്‍ ബര്‍ഷ
യൂണിയന്‍ കോപ് മാന്‍ഖൂല്‍
ലുലു അല്‍ ഖുസൈസ്
മറീന വാക്ക്
വെസ്റ്റ് പാം ബീച്ച്
ബീച്ച് ജെബിആര്‍
ഓപസ് ടവര്‍
അസൂര്‍ റെസിഡന്‍സ്
യൂണിയന്‍ കോപ്പ് ഉം സുഖീം

യുഎഇയിലുടനീളം നിലവില്‍ 150-ലധികം പാര്‍ക്കിംഗ് സ്ഥലങ്ങള്‍ പാര്‍ക്കോണിക് പ്രവര്‍ത്തിപ്പിക്കുന്നു. പാം ജുമൈറ, ദുബൈയിലെ മ്യൂസിയം ഓഫ് ദി ഫ്യൂച്ചര്‍, ജെബിആറിലെ ദി ബീച്ച്, അബൂദബിയിലെ സാദിയാത്ത് ബീച്ച്, ഷാര്‍ജയിലെ അല്‍ ഖസ്ബ എന്നിവയാണ് ഇവയില്‍ ഏറ്റവും ജനപ്രിയമായവ.

2024-ല്‍, പാര്‍ക്കോണിക് ഓപ്പറേറ്റഡ് സൈറ്റുകളിലേക്ക് അവരുടെ ഇ-വാലറ്റ് സംവിധാനം സംയോജിപ്പിക്കുന്നതിനായി സാലിക് പാര്‍ക്കോണിക് കമ്പനിയുമായി ഒരു കരാറില്‍ ഏര്‍പ്പെട്ടിരുന്നു.

Parkon and Salik announce plans to open 18 new parking spaces across Dubai and Sharjah, aiming to ease traffic congestion and improve urban mobility in key areas.