ദുബൈ: പ്രധാന സേവനങ്ങള്‍ ആക്സസ് ചെയ്യുന്നതിന് ഫിസിക്കല്‍ എമിറേറ്റ്സ് ഐഡി കാര്‍ഡുകള്‍ ഹാജരാക്കേണ്ടതിന്റെ ആവശ്യകത ഇല്ലാതാക്കുന്ന ഒരു ബദല്‍ ഡിജിറ്റല്‍ തിരിച്ചറിയല്‍ സംവിധാനം നടപ്പിലാക്കാന്‍ ഒരുങ്ങി യുഎഇ. ഒരു വര്‍ഷത്തിനുള്ളില്‍ ഈ സംവിധാനം ആരംഭിക്കുമെന്നാണ് കരുതുന്നത്.

വിവിധ മേഖലകളില്‍ സേവനം കാര്യക്ഷമമാക്കുന്നതിന് ബയോമെട്രിക് തിരിച്ചറിയല്‍ സംവിധാനം ഉപയോഗിക്കും. ബാങ്കിംഗ്, ആരോഗ്യ സംരക്ഷണം, ഹോസ്പിറ്റാലിറ്റി, ടെലികമ്മ്യൂണിക്കേഷന്‍സ് തുടങ്ങിയ മേഖലകളില്‍ ഇ-എമിറേറ്റ്‌സ് ഐഡികളുടെ ഉപയോഗം വിപുലീകരിക്കുന്നതിനായി ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി (ഐസിപി) നിലവില്‍ പ്രവര്‍ത്തിക്കുന്നുണ്ട്.

ഡിജിറ്റല്‍ പരിവര്‍ത്തനത്തില്‍ രാജ്യം വലിയ പുരോഗതി കൈവരിച്ചിട്ടും ഫിസിക്കല്‍ എമിറേറ്റ്‌സ് ഐഡി കാര്‍ഡ് കാര്‍ഡുകളുടെ തുടര്‍ച്ചയായ ആവശ്യകതയെക്കുറിച്ച് ഫെഡറല്‍ നാഷണല്‍ കൗണ്‍സില്‍ അംഗം അദ്നാന്‍ അല്‍ ഹമ്മദി ആശങ്ക ഉന്നയിച്ചതിനെ തുടര്‍ന്നാണ് പുതിയ സംവിധാനം നടപ്പാക്കാന്‍ ഒരുങ്ങുന്നതെന്നാണ് റിപ്പോര്‍ട്ടുകള്‍.

ഫിസിക്കല്‍ എമിറേറ്റ്‌സ് ഐഡിയുടെ നിരന്തരം ആവശ്യമായി വരുന്നത് താമസക്കാര്‍ക്ക് വെല്ലുവിളികള്‍ ഉയര്‍ത്തുന്നത് തുടരുകയാണെന്ന് അല്‍ ഹമ്മദി അഭിപ്രായപ്പെട്ടിരുന്നു. ആരോഗ്യ സേവനങ്ങള്‍ ലഭിക്കുന്നതിന് രോഗികള്‍ ഇപ്പോഴും ഫിസിക്കല്‍ ഐഡി കാര്‍ഡുകള്‍ ഹാജരാക്കേണ്ടതുണ്ട്. അതേസമയം സാമ്പത്തിക ഇടപാടുകള്‍ക്ക് ബാങ്കുകളും ഇത് ആവശ്യപ്പെടുന്നു. കൂടാതെ, ഹോട്ടലില്‍ ചെല്ലുമ്പോഴും റൂം ലഭിക്കാനായി ഐഡി കാര്‍ഡ് കാണിക്കേണ്ട സ്ഥിതിയാണ്.

'അവശ്യ മേഖലകളില്‍ ഐഡന്റിറ്റി വെരിഫിക്കേഷന്‍ കാര്യക്ഷമമാക്കുന്നതിന് വേഗതയേറിയതും ഫലപ്രദവുമായ പരിഹാരങ്ങള്‍ അടിയന്തിരമായി ആവശ്യമാണ്,' അദ്ദേഹം പറഞ്ഞു.

ഇ-എമിറേറ്റ്സ് ഐഡി ഇതിനകം തന്നെ നിരവധി സേവനങ്ങളില്‍ വിജയകരമായി നടപ്പിലാക്കിയിട്ടുണ്ടെന്ന് ഐസിപിയെ പ്രതിനിധീകരിച്ച് ഫെഡറല്‍ നാഷണല്‍ കൗണ്‍സില്‍ കാര്യ സഹമന്ത്രി അബ്ദുള്‍ റഹ്‌മാന്‍ അല്‍ ഒവൈസ് പറഞ്ഞു. എഫ്എന്‍സി എടുത്തുകാണിച്ച മേഖലകളില്‍ ഇതിന്റെ ഉപയോഗം വിപുലീകരിക്കുന്നതിന് അതോറിറ്റി മുന്‍ഗണന നല്‍കുമെന്നും അദ്ദേഹം കൂട്ടിച്ചേര്‍ത്തു.

യുഎഇപാസ് ആപ്പിനായി ഗിറ്റെക്‌സ്  2021ല്‍ അതോറിറ്റി നേരത്തെ മുഖം തിരിച്ചറിയല്‍ സേവനം ആരംഭിച്ചിരുന്നു. പൗരന്മാര്‍ക്കും താമസക്കാര്‍ക്കും നിരവധി സേവനങ്ങള്‍ ലഭ്യമാക്കുന്ന ആദ്യത്തെ സുരക്ഷിത ദേശീയ ഡിജിറ്റല്‍ ഐഡന്റിറ്റിയാണിത്.

UAEPASS ആപ്പ് വഴി നടപ്പിലാക്കുന്ന പുതിയ സംവിധാനത്തിന് ഐഡന്റിറ്റി വെരിഫിക്കേഷനുമായി ബന്ധപ്പെട്ട വെല്ലുവിളികള്‍ ഉണ്ടാകുമെന്ന് ഐസിപി പറഞ്ഞു. വിവിധ പങ്കാളികളുമായുള്ള സഹകരണം വിപുലമായ ബയോമെട്രിക് ഐഡന്റിഫിക്കേഷന്‍ സിസ്റ്റങ്ങള്‍ വികസിപ്പിക്കാനും പരീക്ഷിക്കാനും ഇതു സഹായിക്കും. അതേസമയം അതോറിറ്റിയുടെ സംവിധാനങ്ങള്‍ക്കുള്ളില്‍ ഈ സാങ്കേതികവിദ്യകള്‍ സ്വീകരിക്കാന്‍ എല്ലാ മേഖലകളില്‍ നിന്നുമുള്ള പ്രധാന പങ്കാളികളെ പ്രോത്സാഹിപ്പിക്കുകയും ചെയ്യും.

എല്ലാ ഉപയോക്താക്കള്‍ക്കും സ്മാര്‍ട്ട് സേവനങ്ങളുടെ നേട്ടങ്ങള്‍ നിലനിര്‍ത്തുന്നതിനും വിശ്വാസം വളര്‍ത്തുന്നതിനും നിയമങ്ങളും ഡാറ്റാ സംരക്ഷണ മാനദണ്ഡങ്ങളും പാലിക്കുന്നുണ്ടെന്ന് ഉറപ്പാക്കുന്ന വ്യക്തമായ സമീപനമാണ് അതോറിറ്റി പിന്തുടരുന്നത്.

The UAE is set to develop a cutting-edge biometric identification system, phasing out physical Emirates ID cards. The move aims to enhance security, streamline services, and support digital transformation.