ലഖ്‌നൗ: ഉറങ്ങിക്കൊണ്ടിരിക്കുകയായിരുന്ന ഭര്‍ത്താവിനെ കഴുത്തു ഞെരിച്ച് കൊന്ന ശേഷം പാമ്പുകടിയേറ്റാണ് ഇയാള്‍ മരിച്ചതെന്ന് വരുത്തിത്തീര്‍ക്കാന്‍ പാമ്പിനെ കിടക്കയില്‍ കൊണ്ടിട്ട ഭാര്യയും സുഹൃത്തും അറസ്റ്റില്‍. പടിഞ്ഞാറന്‍ ഉത്തര്‍പ്രദേശിലെ മീററ്റ് ജില്ലയിലാണ് സംഭവം.

ഞായറാഴ്ച രാവിലെയാണ് അമിത് കശ്യപ് എന്ന മിക്കിയെ കിടക്കയില്‍ മരിച്ച നിലയില്‍ കണ്ടെത്തിയത്. മുറിയില്‍ നിന്ന് ജീവനുള്ള ഒരു അണലിയെയും കണ്ടെടുത്തിരുന്നു.

'അമിത് പാമ്പ് കടിയേറ്റല്ല മരിച്ചതെന്നും, ശ്വാസം കിട്ടാതെയാണ് മരിച്ചതെന്ന് പോസ്റ്റ്മോര്‍ട്ടം റിപ്പോര്‍ട്ടില്‍ വ്യക്തമായി. ഈ കണ്ടെത്തലിനെ തുടര്‍ന്ന് പൊലിസ് അന്വേഷണം ആരംഭിച്ചു, ചോദ്യം ചെയ്യലില്‍ കുറ്റസമ്മതം നടത്തിയതിനെ തുടര്‍ന്ന് രവിതയെയും കാമുകന്‍ അമര്‍ദീപിനെയും അറസ്റ്റ് ചെയ്യുകയായിരുന്നു,' മീററ്റ് സീനിയര്‍ പോലീസ് സൂപ്രണ്ട് വിപിന്‍ ടാഡ പറഞ്ഞു.

മഹ്‌മൂദ്പൂര്‍ സിഖേദ ഗ്രാമത്തിലെ ഒരു പാമ്പാട്ടിയില്‍ നിന്ന് അമര്‍ദീപ് 1,000 രൂപയ്ക്ക് ഒരു അണലിയെ വാങ്ങിയതായി പൊലിസ് സൂപ്രണ്ട് രാകേഷ് കുമാര്‍ മിശ്ര പറഞ്ഞു. ''കൊലപാതകം നടന്ന രാത്രിയില്‍, ഇരുവരും അമിത് ഉറങ്ങുന്നത് വരെ കാത്തിരുന്ന ശേഷം അയാളെ ശ്വാസം മുട്ടിച്ച് കൊലപ്പെടുത്തി. അധികൃതരെ തെറ്റിദ്ധരിപ്പിക്കാനും സംശയം ഒഴിവാക്കാനും, അവര്‍ പാമ്പിനെ ഇയാളുടെ കിടക്കയില്‍ കൊണ്ടിട്ടു, പാമ്പ് പലതവണ അമിതിനെ കടിച്ചു,'' മിശ്ര പറഞ്ഞു.

പൊലിസ് അന്വേഷണത്തില്‍ രവിതയും അമര്‍ദീപും ഒരു വര്‍ഷമായി പ്രണയത്തിലായിരുന്നുവെന്ന് കണ്ടെത്തി. അമിതിനൊപ്പം ജോലി ചെയ്തിരുന്ന അമര്‍ദീപ് ഇടയ്ക്കിടെ അദ്ദേഹത്തിന്റെ വീട്ടില്‍ വരുമായിരുന്നു.

'അമിത് അടുത്തിടെയാണ് ഭാര്യയുടെ വിവാഹേതര ബന്ധത്തെക്കുറിച്ച് അറിഞ്ഞത്, അദ്ദേഹം അതിനെ എതിര്‍ത്തു. ഇതാണ് അമിതിനെ കൊല്ലാന്‍ ദമ്പതികളെ പ്രേരിപ്പിച്ചത്.' ഒരു പൊലിസ് ഉദ്യോഗസ്ഥന്‍ പറഞ്ഞു.

A woman and her boyfriend were arrested in Uttar Pradesh for strangling her husband in his sleep and placing a snake in the bed to stage a fake snakebite death.