കൊച്ചി: സി.എം.ആർ.എൽ-എക്‌സാലോജിക് കേസിൽ തുടർ നടപടികളുമായി ഇ.ഡി (എഫോഴ്‌സ്‌മെന്റ് ഡയറക്ടറേറ്റ്). ഇതിന്റെ ഭാഗമായി വീണ വിജയൻ അടക്കമുള്ളവരുടെ മൊഴിപ്പകർപ്പ് ആവശ്യപ്പെട്ട് ഇ.ഡി അപേക്ഷ നൽകിയിട്ടുണ്ട്. എറണാകുളം സെഷൻസ് കോടതിയിലാണ് ഇ.ഡി അപേക്ഷ നൽകിയിരിക്കുന്നത്.

സി.എം.ആർ.എൽ -എക്സാലോജിക് കേസിൽ എസ്.എഫ്.ഐ.ഒ കുറ്റപത്രം സമർപ്പിച്ചതിന് പിന്നാലെ കോടതിയിൽ അപേക്ഷ നൽകി ഇ.ഡി കുറ്റപത്രം വാങ്ങിയിരുന്നു. ഈ കുറ്റപത്രം പരിശോധിച്ചതിന് ശേഷമാണ് കേസുമായി ബന്ധപ്പെട്ട എല്ലാ രേഖകളുടേയും പകർപ്പും മുഖ്യമന്ത്രി മകൾ വീണ വിജയനടക്കമുള്ളവരുടെ മൊഴിയും ആവശ്യപ്പെട്ട് ഇ.ഡി വീണ്ടും കോടതിയെ സമീപിച്ചത്.

2013ലെ കമ്പനി നിയമത്തിലെ 129(7), 134(8), 447, 448 വകുപ്പുകൾ കുറ്റാരോപിതർക്കെതിരെ നിലനിൽക്കുമെന്നു കണ്ടെത്തിയാണ് സെഷൻസ് കോടതി കുറ്റപത്രം സ്വീകരിച്ചത്. വീണാ വിജയൻ, സി.എം.ആർ.എൽ എംഡി ശശിധരൻ കർത്ത അടക്കം എട്ടു പേരും അഞ്ച് സ്ഥാപനങ്ങളുമാണ് എസ്എഫ്‌ഐഒ കുറ്റപത്രം അനുസരിച്ച് പ്രതിപ്പട്ടികയിലുള്ളത്. എക്‌സാലോജിക് കമ്പനിക്ക് 2.70 കോടി രൂപ സി.എം.ആർ.എല്ലിൽനിന്ന് ലഭിച്ചെന്നാണ് എസ്.എഫ്.ഐ.ഒ അന്വേഷണത്തിലെ കണ്ടെത്തൽ.

അതിനിടെ, ഇടപാടിൽ സി.ബി.ഐ അന്വേഷണം ആവശ്യപ്പെട്ടുള്ള ഹരജിയിൽ മുഖ്യമന്ത്രിക്കും മകൾക്കുമെതിരേ ഹൈക്കോടതി നോട്ടിസ് അയച്ചിരുന്നു. ഇന്റെറിം സെറ്റിൽമെന്റ് ബോർഡിലെ രേഖകളുടെ അടിസ്ഥാനത്തിൽ അന്വേഷണം സി.ബി.ഐക്ക് വിടണമെന്നാവശ്യപ്പെട്ട് മാധ്യമ പ്രവർത്തകൻ എം.ആർ. അജയൻ നൽകിയ പൊതുതാൽപര്യ ഹരജിയിലായിരുന്നു ഹൈക്കോടതി നടപടി.

The Enforcement Directorate has moved the Ernakulam Sessions Court requesting copies of statements by Veena Vijayan and others in the CMRL-Exalogic case.