കൊല്‍ക്കത്ത: സുപ്രീം കോടതിക്കെതിരെ രൂക്ഷ വിമര്‍ശനവുമായി പശ്ചിമ ബംഗാളില്‍ നിന്നുള്ള ബിജെപി എംഎല്‍എ. ചീഫ് ജസ്റ്റിസ് രാജ്യം ഭരിക്കുകയാണെങ്കില്‍ ഇന്ത്യക്ക് പാര്‍ലമെന്റിന്റെ ആവശ്യമില്ലെന്നാണ് ബിജെപി എംഎല്‍എ അഗ്നിമിത്ര പോളിന്റെ പരാമര്‍ശം. ബിജെപി നേതാവും, എംപിയുമായ നിശികാന്ത് ദുബെയുടെ വിവാദ പരാമര്‍ശത്തിന് പിന്തുണച്ചാണ് എംഎല്‍എ രംഗത്തെത്തിയിട്ടുള്ളത്.

'നിഷികാന്ത് ദുബെ പറഞ്ഞ കാര്യം കൃത്യമാണ്. രാഷ്ട്രപതിയാണ് ഇന്ത്യയില്‍ ചീഫ് ജസ്റ്റിസിനെ നിയമിക്കുന്നത്. പിന്നെ എങ്ങനെയാണ് ചീഫ് ജസ്റ്റിസിന് രാഷ്ട്രപതിയുടെ ഉത്തരവ് നിഷേധിക്കാന്‍ കഴിയുക. 

രാജ്യത്തെ എംപിമാരുടെയും, നയം രൂപീകരിക്കുന്നവരുടെയും തീരുമാനം എങ്ങനെ സുപ്രീം കോടതിക്ക് നിഷേധിക്കാന്‍ കഴിയും. രാജ്യം ചീഫ് ജസ്റ്റിസും, സുപ്രീം കോടതിയും ഭരിക്കുകയാണെങ്കില്‍ പാര്‍ലമെന്റിന്റെ ആവശ്യമില്ലല്ലോ? എല്ലാം ചീഫ് ജസ്റ്റിസ് ചെയേണ്ടി വരില്ലേ?, എംഎല്‍എ ചോദിച്ചു. 

നേരത്തെ സുപ്രീം കോടതിക്കെതിരെ ബിജെപി എംപി നിഷികാന്ത് ദുബെ നടത്തിയ പരാമര്‍ശം വലിയ വിവാദങ്ങള്‍ക്ക് തുടക്കം കുറിച്ചിരുന്നു.