ശ്രീന​ഗർ: ജമ്മു കശ്മീരിൽ വിനോദ സഞ്ചാരികൾക്കു നേരെ ഭീകരാക്രമണം. അനന്ത്‌നാഗ് ജില്ലയിലെ പഹൽഗാമിലെ ബൈസരൻ താഴ്‌വരയിൽ നടന്ന ഭീകരാക്രമണത്തിൽ ഒരാൾ കൊല്ലപ്പെട്ടു. നിരവധി വിനോദസഞ്ചാരികൾക്ക് പരിക്കേറ്റതായും പോലീസ് അറിയിച്ചു. ആക്രമണത്തിൽ അഞ്ച് പേർക്ക് പരിക്കേറ്റതായാണ് ആദ്യ വിവരം പുറത്തു വന്നത്. രണ്ട് പേർക്ക് ഭീകരരുടെ വെടിയേറ്റെന്നാണ് സ്ഥിരീകരണം. ഒപ്പ മുണ്ടായിരുന്ന പുരുഷന്റെ തലയ്ക്കാണ് വെടിയേറ്റത്. വെടിയേറ്റയാളുടെ ഭാര്യയാണ് പൊലീസ് കൺട്രോൾ റൂമിൽ വിവരം അറിയിക്കുന്നത്. ആക്രമണത്തിന് ശേഷം ഭീകരർ സ്ഥലം വിട്ടു. ആക്രമണത്തെ തുടർന്ന് സുരക്ഷാ സേനയെ പ്രദേശത്തേക്ക് അടിയന്തരമായി വിന്യസിക്കപ്പെട്ടു. കാൽനടയോ കുതിരപ്പുറത്തോ മാത്രം പ്രവേശനം സാധ്യമായ ഈ പ്രദേശത്ത് രക്ഷാപ്രവർത്തനങ്ങൾ ദുഷ്കരമായി തുടരുകയാണ്. പരിക്കേറ്റവരെ രക്ഷപ്പെടുത്താൻ ഹെലികോപ്റ്റർ സർവീസ് ഏർപ്പെടുത്തിയതായും, ചിലരെ പ്രദേശവാസികൾ കുതിരകളിൽ താഴെയെത്തിച്ചതായും അധികൃതർ അറിയിച്ചു. 

പഹൽഗാം ആശുപത്രിയിൽ പ്രവേശിപ്പിച്ച വിനോദസഞ്ചാരികളിൽ 12 പേരുടെ നില തൃപ്തികരമാണെന്ന് ഡോക്ടർമാർ വ്യക്തമാക്കി. ആക്രമണത്തിന്റെ പൂർണ വിവരങ്ങൾ ഇനിയും വ്യക്തമല്ല. സൗദി അറേബ്യയിൽ സന്ദർശനത്തിലായിരുന്ന പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷായുമായി ബന്ധപ്പെട്ട് ആവശ്യമായ നടപടികൾ സ്വീകരിക്കാൻ നിർദേശിച്ചു. സ്ഥലം സന്ദർശിക്കാൻ അമിത് ഷായോട് പ്രധാനമന്ത്രി ആവശ്യപ്പെട്ടു.

ജമ്മു കശ്മീർ മുഖ്യമന്ത്രി ഒമർ അബ്ദുള്ള ആക്രമണത്തിൽ ദുഃഖം രേഖപ്പെടുത്തി. നമ്മുടെ സന്ദർശകർക്കെതിരായ ഈ മ്ലേച്ഛമായ ആക്രമണം അപലപനീയമാണ്. പരിക്കേറ്റവരുടെ ചികിത്സ ഉറപ്പാക്കും, ‍ ഉടൻ ശ്രീനഗറിലേക്ക് മടങ്ങുമെന്നും സമൂഹ മാധ്യമമായ X-ൽ കുറിച്ചു.

പഹൽഗാമിൽ വിനോദസഞ്ചാരികൾക്ക് നേരെയുണ്ടായ ഭീരുത്വപരമായ ആക്രമണത്തെ ശക്തമായി അപലപിക്കുന്നു. കുറ്റവാളികൾ ശിക്ഷിക്കപ്പെടും. സൈന്യവും പോലീസും തിരച്ചിൽ ആരംഭിച്ചു," ലഫ്റ്റനന്റ് ഗവർണർ മനോജ് സിൻഹ പറഞ്ഞു. പരിക്കേറ്റവർക്ക് അടിയന്തര വൈദ്യസഹായം ഉറപ്പാക്കാൻ ജില്ലാ ഭരണകൂടത്തിനും ആരോഗ്യ വകുപ്പിനും നിർദേശം നൽകിയതായി അദ്ദേഹം അറിയിച്ചു.

A militant attack targeting tourists in Jammu and Kashmir has resulted in the death of one person and injuries to several others. Authorities are investigating the incident, which occurred in a popular tourist area, sparking concerns over the safety of visitors in the region.