കോഴിക്കോട്: കുറ്റ്യാടി നരിപ്പറ്റയില്‍ നടന്ന പൊലിസ് റെയ്ഡില്‍ വന്‍തോതില്‍ മയക്കുമരുന്ന് പിടിച്ചെടുത്തു. പ്രവാസിയായിരുന്ന യുവാവിന്റെ വീട്ടില്‍ നടത്തിയ തിരച്ചിലില്‍ 10 ലക്ഷം രൂപയോളം വിലവരുന്ന എംഡിഎംഎ യാണ് കണ്ടെത്തിയത്. ഇന്നലെ രാത്രിയായിരുന്നു കുറ്റ്യാടി പൊലിസ് ഇന്‍സ്‌പെക്ടറുടെ നേതൃത്വത്തില്‍ നരിപ്പറ്റ സൂപ്പര്‍മുക്കിലെ ചാത്തോത്ത് നാസറിന്റെ മകന്‍ നഹിയാന്റെ വീട്ടില്‍ റെയ്ഡ് നടത്തിയത്. പരിശോധനയില്‍ കിടപ്പുമുറിയില്‍ പ്ലാസ്റ്റിക് പാക്കറ്റുകളില്‍ പൊതിഞ്ഞ് ബാഗില്‍ സൂക്ഷിച്ചിരുന്ന 125 ഗ്രാം എംഡിഎംഎ പൊലിസ് കണ്ടെത്തി. അതേസമയം, നഹിയാനെ ഇതുവരെ പിടകൂടാനായിട്ടില്ല. 

നരിപ്പറ്റ, കമ്പനിമുക്ക് പ്രദേശങ്ങളില്‍ നഹിയാന്റെ നേതൃത്വത്തിലുള്ള ഒരു സംഘം മയക്കുമരുന്ന് വിതരണം നടത്തിയിരുന്നുവെന്ന് നേരത്തെ പൊലിസിന് വിവരം ലഭിച്ചിരുന്നു. ഇതിനെ തുടര്‍ന്ന് ഏറെക്കാലമായി നഹിയാന്‍ പൊലിസ് നിരീക്ഷണത്തിലായിരുന്നു. നഹിയാനെ പിടികൂടാനുള്ള ശ്രമങ്ങള്‍ നടക്കുകയാണെന്ന് പൊലിസ് അറിയിച്ചു. പ്രദേശത്ത് ലഹരി ഉപയോഗം വര്‍ദ്ധിച്ചുവരുന്ന സാഹചര്യത്തില്‍, ലഹരി മാഫിയയെ തടയാന്‍ കര്‍ശന നടപടികള്‍ തുടരുമെന്നും അധികൃതര്‍ അറിയിച്ചു.

മുന്‍പ് പ്രവാസിയായിരുന്ന നഹിയാന്‍ വിവാഹ ശേഷം നാട്ടില്‍ താമസമാക്കിയിരുന്നു. ഇയാളുടെ പേരില്‍ സാമ്പത്തിക തട്ടിപ്പ് ആരോപണങ്ങളും നിലനിന്നിരുന്നതായി അറിയുന്നു.

A significant drug seizure was made in Kozhikode's Narippatta, with authorities confiscating MDMA worth ₹10 lakh. The bust highlights ongoing efforts to combat drug trafficking in the region. Further investigations are likely underway to identify those involved in the illicit trade