ശ്രീനഗർ: പഹൽഗാമിൽ നടന്ന ഭീകരാക്രമണത്തിൽ കൊല്ലപ്പെട്ടവരുടെ കുടുംബങ്ങൾക്ക് ജമ്മു കശ്മീർ സർക്കാർ 10 ലക്ഷം രൂപ വീതം ധനസഹായം പ്രഖ്യാപിച്ചു. ഗുരുതരമായി പരിക്കേറ്റവർക്ക് 2 ലക്ഷം രൂപയും നിസാര പരിക്കേറ്റവർക്ക് 1ലക്ഷം രൂപയും നഷ്ടപരിഹാരമായി നൽകുമെന്ന് മുഖ്യമന്ത്രി ഒമർ അബ്ദുള്ളയുടെ ഓഫീസ് അറിയിച്ചു.

26 പേരുടെ ജീവൻ അപഹരിച്ച ഈ ദാരുണമായ ആക്രമണത്തിൽ രാജ്യം ദുഃഖത്തിലാണ്. "നിരപരാധികൾക്കെതിരായ ഈ ക്രൂരമായ അക്രമം ഒരു തരത്തിലും അംഗീകരിക്കാനാവില്ല. പ്രിയപ്പെട്ടവരെ നഷ്ടപ്പെട്ടവർക്ക് ഒരു തുകയും നഷ്ടപരിഹാരമാകില്ലെങ്കിലും, ഐക്യദാർഢ്യത്തിന്റെയും പിന്തുണയുടെയും പ്രകടനമായാണ് ഈ ധനസഹായം," മുഖ്യമന്ത്രി പ്രസ്താവനയിൽ പറഞ്ഞു.

പഹൽഗാമിലെ ഭീകരാക്രമണം ഞങ്ങളെ ഞെട്ടിച്ചിരിക്കുന്നു. നിരപരാധികളായ സാധാരണക്കാർക്കെതിരായ ഈ വിവേകരഹിതമായ അക്രമത്തെ ഏറ്റവും ശക്തമായി അപലപിക്കുന്നു," മുഖ്യമന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ വ്യക്തമാക്കി.

മരിച്ചവരുടെ മൃതദേഹങ്ങൾ അവരുടെ ജന്മനാട്ടിലേക്ക് മാന്യമായി എത്തിക്കുന്നതിനുള്ള ക്രമീകരണങ്ങൾ പുരോഗമിക്കുകയാണ്. പരിക്കേറ്റവർക്ക് മികച്ച ചികിത്സ ഉറപ്പാക്കിയിട്ടുണ്ടെന്നും അധികൃതർ അറിയിച്ചു.