ബാംഗ്ലൂർ: ഐപിഎല്ലിൽ ഇന്ന് നടക്കുന്ന പോരാട്ടത്തിൽ റോയൽ ചലഞ്ചേഴ്‌സ് ബെംഗളൂരുവും രാജസ്ഥാൻ റോയൽസുമാണ് ഏറ്റുമുട്ടുന്നത്. ബെംഗളൂരുവുവിന്റെ തട്ടകമായ ചിന്നസ്വാമി സ്റ്റേഡിയത്തിൽ  മത്സരം നടക്കുന്നത്. പ്ലേ ഓഫ് സാധ്യതകൾ നിലനിർത്തണമെങ്കിൽ രാജസ്ഥാന് വിജയം അനിവാര്യമാണ്. മറുഭാഗത്ത് പോയിന്റ് പട്ടികയിൽ മുന്നോട്ട് പോവാനായിരിക്കും ആർസിബി ലക്ഷ്യം വെക്കുക. 

മത്സരത്തിൽ രാജസ്ഥാന്റെ ശ്രീലങ്കൻ സ്പിന്നർ മഹീഷ് തീക്ഷണക്ക് ഒരു തകർപ്പൻ നേട്ടം സ്വന്തമാക്കാൻ സാധിക്കും. ടി-20യിൽ 200 വിക്കറ്റുകൾ സ്വന്തമാക്കാനാണ് താരത്തിന് സാധിക്കുക. ഈ നേട്ടത്തിലേക്കെത്താൻ ലങ്കൻ താരത്തിന് വേണ്ടത് വെറും ഒരു വിക്കറ്റ് മാത്രമാണ്. ടി-20യിൽ 192 മത്സരങ്ങളിൽ നിന്നും 199 വിക്കറ്റുകളാണ്‌ താരം ഇതുവരെ വീഴ്ത്തിയിട്ടുള്ളത്. ഈ സീസണിൽ എട്ട് മത്സരങ്ങളിൽ നിന്നും ഏഴ് വിക്കറ്റുകളാണ്‌ താരം നേടിയിട്ടുള്ളത്. 

മത്സരത്തിൽ പരുക്കേറ്റ സഞ്ജു സാംസൺ കളിക്കാത്തത് രാജസ്ഥാന് കനത്ത തിരിച്ചടിയായിരിക്കും നൽകുക. ഡൽഹി ക്യാപ്പിറ്റൽസിനെതിരായ മത്സരത്തിൽ ആണ് സഞ്ജു പരുക്കേറ്റ് പുറത്തായത്. മത്സരത്തിൽ മികച്ച തുടക്കമായിരുന്നു രാജസ്ഥനായി സഞ്ജു നൽകിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി. കൃണാൽ പാണ്ഡ്യക്ക് ശേഷം ഐപിഎല്ലിൽ പരുക്കേറ്റ് പുറത്താകുന്ന രണ്ടാമത്തെ ക്യാപ്റ്റൻ കൂടിയാണ് സഞ്ജു. 

ബാറ്റിങ്ങിൽ ഓപ്പണർ യശ്വസി ജെയ്‌സ്വാളിന്റെ മികച്ച ഫോമും രാജസ്ഥാന് പ്രതീക്ഷ നൽകുന്ന ഘടകമാണ്. ഈ സീസണിൽ എട്ട് മത്സരങ്ങളിൽ നിന്നും നാല് അർദ്ധ സെഞ്ച്വറികൾ ഉൾപ്പടെ 307 റൺസാണ് ജെയ്‌സ്വാൾ നേടിയിട്ടുള്ളത്. 

Just one wicket is needed Rajasthan star to make history in Royals battle