തിരുവനന്തപുരം: പ്രമുഖ കാറ്റാടി യന്ത്ര ടർബൈൻ നിർമ്മാണ കമ്പനിയായ സൈമൻസ് ഗമേസ റന്യൂവബിൾ എനർജി ലിമിറ്റഡിന്റെ പേരിൽ നടക്കുന്ന പുതിയ ഓൺലൈൻ നിക്ഷേപ തട്ടിപ്പിനെ കുറിച്ച് കേരളാ പൊലീസ് മുന്നറിയിപ്പ് നൽകി.

 വാട്സാപ്പ് ഗ്രൂപ്പുകൾ വഴി ആളുകളെ ആകർഷിച്ച് വ്യാജ നിക്ഷേപ ആപ്പുകൾ ഇൻസ്റ്റാൾ ചെയ്യാൻ പ്രേരിപ്പിക്കുന്ന ഈ തട്ടിപ്പിൽ, തുടക്കത്തിൽ ചെറിയ ലാഭവിഹിതങ്ങൾ വാഗ്ദാനം ചെയ്ത് വിശ്വാസം നേടിയെടുക്കുന്നു. പിന്നീട്, കൂടുതൽ ആളുകളെ നിക്ഷേപകരായി ചേർക്കാൻ പ്രേരിപ്പിച്ച് മണിചെയിൻ മാതൃകയിൽ തട്ടിപ്പ് വ്യാപിപ്പിക്കുന്നു. നിക്ഷേപകർ പണം മടക്കി ആവശ്യപ്പെടുമ്പോൾ വ്യത്യസ്ത കാരണങ്ങൾ പറഞ്ഞ് തട്ടിപ്പുകാർ പണം നൽകാതിരിക്കുകയാണ്. സൈമൻസ് ഗമേസ റന്യൂവബിൾ എനർജി ലിമിറ്റഡിന്റെ യഥാർത്ഥ കമ്പനിയുമായി ഈ തട്ടിപ്പുകാർക്ക് യാതൊരു ബന്ധവും ഇല്ലെന്ന് പൊലീസ് അറിയിച്ചു.

ഇത്തരത്തിലുള്ള വ്യാജ നിക്ഷേപ ആപ്പുകൾ, ലിങ്കുകൾ, പരസ്യങ്ങൾ എന്നിവ ഒഴിവാക്കാൻ പൊതുജനങ്ങളോട് പൊലീസ് അഭ്യർത്ഥിച്ചു. ഓൺലൈൻ സാമ്പത്തിക കുറ്റകൃത്യങ്ങൾ ശ്രദ്ധയിൽപ്പെടുകയോ ഇരയാവുകയോ ചെയ്താൽ, 1930 എന്ന സൗജന്യ ഫോൺ നമ്പറിൽ ബന്ധപ്പെടുകയോ https://cybercrime.gov.in എന്ന വെബ്സൈറ്റ് മുഖേന പരാതികൾ സമർപ്പിക്കാവുന്നതാണെന്ന് പൊലീസ് അറിയിച്ചു.​

Kerala Police have issued a warning about an online investment scam impersonating Siemens Gamesa Renewable Energy Ltd. Victims are lured through WhatsApp groups and fake investment apps, leading to financial losses. Authorities advise the public to avoid such fraudulent schemes and report any suspicious activities.​