മസ്‌കത്ത്: ജബല്‍ അഖ്ദറില്‍ വെള്ളിയാഴ്ച വൈകുന്നേരം ഉണ്ടായ വാഹനാപകടത്തില്‍ മൂന്ന് ഒമാനി പൗരന്മാര്‍ക്ക് ദാരുണാന്ത്യം. വാഹനാപകടത്തില്‍ മറ്റുചിലര്‍ക്ക് പരുക്കേറ്റതായി റോയല്‍ ഒമാന്‍ പൊലിസ് (ആര്‍ഒപി) അറിയിച്ചു.

വാഹനാപകടത്തില്‍ മൂന്നു പേര്‍ സംഭവസ്ഥലത്ത് വെച്ചുതന്നെ മരിച്ചുവെന്ന് പൊലിസ് അറിയിച്ചു. ജബല്‍ അഖ്ദറില്‍ നിന്ന് ഇറങ്ങുമ്പോള്‍ ഇവര്‍ സഞ്ചരിച്ച കാര്‍ മലഞ്ചെരുവില്‍ ഇടിച്ച് തീപിടിച്ചതാണ് അപകടത്തിന് കാരണമായത്. ഇതാണ് മൂന്നു പേരുടെ മരണത്തിനും നിരവധി പേര്‍ക്ക് പരുക്കേല്‍ക്കുന്നതിനും കാരണമായതെന്ന് റോയല്‍ ഒമാന്‍ പൊലിസ് ഉദ്യോഗസ്ഥന്‍ ഗള്‍ഫ് ന്യൂസിനോട് പറഞ്ഞു.

കുത്തനെയുള്ള ഒരു വളവില്‍ സഞ്ചരിക്കാന്‍ ശ്രമിക്കുന്നതിനിടെ ഡ്രൈവര്‍ക്ക് വാഹനത്തിന്റെ നിയന്ത്രണം നഷ്ടപ്പെട്ടതായി റിപ്പോര്‍ട്ടുണ്ട്. 

'കുത്തനെയുള്ള ഒരു വളവിലേക്ക് അടുക്കുകയാണെന്ന് ഡ്രൈവര്‍ക്ക് മനസ്സിലായില്ല, അതുകൊണ്ടാണ് അദ്ദേഹത്തിന് നിയന്ത്രണം നഷ്ടപ്പെട്ടത്,' ഉദ്യോഗസ്ഥന്‍ പറഞ്ഞു.

ജബല്‍ അഖ്ദറിലേക്കും മറ്റ് പര്‍വതപ്രദേശങ്ങളിലേക്കും പോകുന്ന വാഹനമോടിക്കുന്നവര്‍ യാത്ര ചെയ്യുന്നതിന് മുമ്പ് അവരുടെ വാഹനങ്ങളുടെ അറ്റകുറ്റപ്പണികള്‍ ഉറപ്പാക്കണമെന്നും, അത്തരം അപകടങ്ങള്‍ തടയാന്‍ ഇതു സഹായിക്കുമെന്നും റോയല്‍ ഒമാന്‍ പൊലിസ് അഭ്യര്‍ത്ഥിച്ചു.

ഹജര്‍ പര്‍വതനിരയുടെ ഭാഗമായ ജബല്‍ അല്‍ അഖ്ദറിലേക്ക് തലസ്ഥാനമായ മസ്‌കത്തില്‍ നിന്നും ഏകദേശം രണ്ട് മണിക്കൂര്‍ യാത്രയുണ്ട്. മികച്ച കാലാവസ്ഥയും ഹോട്ടല്‍ സൗകര്യങ്ങളുമാണ് ഈ വിനോദസഞ്ചാര കേന്ദ്രത്തെ രാജ്യത്തെ ഏറ്റവും പ്രശസ്തമായ വിനോദസഞ്ചാര കേന്ദ്രങ്ങളിലൊന്നാക്കി മാറ്റുന്നത്.

A fatal car accident at Jabal Akhdar in Oman has claimed the lives of three individuals. Authorities are investigating the cause as the community mourns the tragic loss.