കോഴിക്കോട്: പാക് പൗരത്വമുള്ള 4 പേർക്ക് രാജ്യം വിടാൻ നോട്ടീസ് നൽകി പൊലിസ്. 27ന് മുൻപ് രാജ്യം വിടണമെന്ന് ചൂണ്ടിക്കാട്ടിയാണ് വർഷങ്ങളായി കോഴിക്കോട് താമസിക്കുന്ന നാല് പാക് പൗരൻമാർക്ക് നോട്ടീസ് കിട്ടിയത്. രേഖകൾ പരിശോധിച്ചതിന് ശേഷം മാത്രം നടപടിയിലേക്ക് കടക്കാനാണ് പൊലിസ് തീരുമാനം. പഹൽഗാം ആക്രമണത്തിന് പിന്നാലെ പാക് പൗരത്വമുള്ളവർ രാജ്യം വിടണമെന്ന് കേന്ദ്ര സർക്കാർ തീരുമാനം വന്നതോടെയാണ് നടപടി. 

കൊയിലാണ്ടിയിൽ താമസിക്കുന്ന പുത്തൻപുര വളപ്പിൽ ഹംസ, വടകര സ്വദേശികളായ രണ്ടുപേർ, ഒരു പെരുവണ്ണാമൂഴി സ്വദേശി എന്നിവർക്കാണ് നോട്ടീസ്. പാകിസ്താനിൽ നിന്ന് വന്ന് ഏറെക്കാലമായി നാട്ടിൽ കഴിയുന്ന ഇവർ ഇന്ത്യൻ പൗരത്വത്തിന് അപേക്ഷ നൽകി കാത്തിരിക്കുകയാണ്.

1965ൽ ജ്യേഷ്ഠനൊപ്പം കച്ചവടത്തിനായി പാകിസ്താനിലേക്ക് പോയ ആളാണ് കൊയിലാണ്ടി പുത്തൻപുരക്കൽ ഹംസ. ഇദ്ദേഹം 2007ൽ കേരളത്തിൽ തിരിച്ചെത്തി താമസം തുടങ്ങി. നിലവിൽ താൽക്കാലിക വിസയിലാണ് നാട്ടിൽ തുടരുന്നത്. പൗരത്വത്തിനുള്ള അപേക്ഷ നൽകിയെങ്കിലും ഇതുവരെ ലഭിച്ചിട്ടില്ല. തുടർന്ന് ഇയാൾ ഹെെക്കോടതിയെ സമീപിക്കുകയും, ഇന്ത്യയിൽ താമസിക്കാനുള്ള ഇടക്കാല ഉത്തരവ് ലഭിക്കുകയും ചെയ്തു. 

ഇവരെകൂടാതെ വടകര സ്വദേശി ഖമറുന്നിസ, സഹോദരി അസ്മ എന്നിവർക്കും രാജ്യം വിടണമെന്ന് കാണിച്ച് പൊലീസ് നോട്ടീസ് നൽകിയിട്ടുണ്ട്. മലയാളിയായ ഇവരുടെ പിതാവ് കറാച്ചിയിൽ ബിസിനസുകാരനായിരുന്നു. 1992ലാണ് ഇവരുവരും ഇന്ത്യയിലേക്ക് മടങ്ങിയത്. ഒരു പെരുവണ്ണാമുഴി സ്വദേശിക്കും നോട്ടീസ് ലഭിച്ചു. ഇന്ത്യയിൽ താമസിക്കാൻ അനുവദിക്കണമെന്ന് ആവശ്യപ്പെട്ട് കോടതിയെ സമീപിക്കാനാണ് നോട്ടീസ് ലഭിച്ചവരുടെ തീരുമാനം.

Police issue notice for 4 Pakistan citizenship holders living in kerala